බදුල්ල තල්දෙන ප්‍රදේශයේ පදිංචි පුද්ගලයෙකු මුඛයේ කෑල්ලක් නැතිවනසේ බරපතල තුවාල ලබා බදුල්ල ශික්ෂණ රෝහලට ඇතුලත් කර සිටියදි පසු ගිය (17) වනදා රාත්‍රීයේ මියගොස් ඇති බව වාර්තා වනවා.
මරණයට පත්ව ඇත්තේ, අන්නාසිතැන්න, ගල්ගේලන්ද තල්දෙන ලිපිනයේ පදිංචිව සිටි 61 හැවිරිදි අයෙක්.
පසුගිය 6 වනදා ඇතිවු කිසියම් සිදුවීමකින් මොහුගේ මුඛයේ කොටසක් කැඩී ගොස් බරපතල තුවාල ලබා ඇතැයි විමර්ශනවලදී අනාවරණය වී ඇතත් එය කෙසේ සිදුවී දැයි මේ දක්වා තහවුරු කර ගැනීමට නොහැකිවී ඇති බවත් පොලිසිය පවසනවා.
සිදුවීමෙන් තුවාල ලත් ඔහු කමිසය ගලවා කමිසයෙන් මුහුණ ආවරණය කරගෙන 12 ගල නැමති ස්ථානයේ සිට පාගමනින්ම කිලෝමීටර එකහමාරක් පමණ දුරින් පිහිටා ඇති සිය සොහොයුරාගේ වෙළදසැල වෙත පැමිණ ඇති අතර එහිදී ඔවුන් විසින් මොහු රෝහල් ගත කර ඇති බව විමර්ශනවලදී තවදුරටත් අනාවරණය වූ බව පොලිසිය සඳහන් කළා.
මරණය සැකසහිත මරණයක් සේ සලකා අධිකරණයට කරුණු වාර්තා කිරීමට පොලිසිය කටයුතු කර ඇති අතර ඒ අනුව, මහේස්ත්‍රාත් පරීක්ෂණය ඊයේ (18) දින පැවැත්වීමෙන් පසු සිදුකරන ලද පශ්චාත් මරණ පරික්ෂණයේදී මේ පිළිබඳව විවෘත තීන්දුවක් ලබාදුන් බව ද පොලිසිය පවසනවා.
