පසුගිය සැප්තැම්බර් මස 19 වනදා මිදිගම, ගොවියාපාන ප්‍රදේශයේ දී යතුරුපැදියකින් පැමිණ වෙඩිතබා පුද්ගලයෙකු ඝාතනය කර තවත් දෙදෙනෙකුට බරපතළ තුවාල සිදුකළ සිද්ධියට සැකකරුවන් 08 දෙනෙක් අත්අඩංගුවට ගෙන තිබෙනවා.
මාතර කොට්ඨාස අපරාධ විමර්ශන කාර්යාංශයේ නිලධාරීන් විසින් ඊයේ (03) වැල්ලවාය, අහංගම සහ මිදිගම යන ප්‍රදේශවල දී මෙම සැකකරුවන් පිරිස අත්අඩංගුවට ගෙන ඇති බවයි වාර්තා වුණේ.
මේ අතර වෙඩි තැබීමෙන් පසු ගිනි අවිය ප්‍රවාහනය සඳහා යොදාගත් ත්‍රිරෝද රථය ද පොලිසිය විසින් සොයාගෙන ඇති බවයි වාර්තා වන්නේ.
අත්අඩංගුවට ගත් පිරිස අතර සැකකාරියක් ද සිටින අතර, ඇය වයස අවුරුදු 41ක අහංගම ප්‍රදේශයේ පදිංචිකාරිණියක්.
අනෙකුත් සැකකරුවන් 07 දෙනා වයස අවුරුදු 20 ත් 42ත් අතර වයස්වල පසුවන්නන් බවයි පොලිසිය සඳහන් කළේ.
වෙඩි තැබීම සිදුකළ වෙඩික්කරු, වෙඩි තැබීමෙන් පසු පිස්තෝල ගිනි අවිය සන්තකයේ තබාගෙන සිටි පුද්ගලයා සහ අපරාධයට ආධාර අනුබල දුන් හයදෙනෙක් මෙලෙස අත්අඩංගුවට ගැනුණු පිරිස අතරට අයත්.
පිස්තෝල ගිනි අවිය සන්තකයේ තබාගෙන සිටි සැකකරු සන්තකයේ තිබී මත්ද්‍රව්‍ය ජාවාරමෙන් උපයාගත් මුදල් රුපියල් 1,542,000ක් ද සොයාගෙන ඇති අතර, ඔහු විදෙස් රටක සැඟව සිටිමින් මෙරට මත්ද්‍රව්‍ය ජාවාරම සහ සංවිධානාත්මක අපරාධ සිදුකරනු ලබන පුද්ගලයෙකුගේ සමීපතපමයෙක් බවට ද හඳුනාගෙන තිබෙනවා.
මෙම වෙඩි තැබීමෙන් 38 හැවිරිදි මාළු ව්‍යාපාරිකයෙකු ජීවිතක්ෂයට පත් වුණා.
