දේශපාලන බලපෑම්වලින් තොරව ස්වාධීනව තම ඇඟලුම් කම්හලේ මෙහෙයුම් කටයුතු සිදු කිරීමට අවස්ථාව සලසා දෙන ලෙසට පසුගියදා කිසියම් පිරිසක් විසින් පහරදීමක් සිදු කරනු ලැබූ කටාන හල්පේ ප්රදේශයේ ඇඟලුම් කම්හලේ ඕමාන හිමිකරු බලධාරීන්ගෙන් ඉල්ලීමක් කරනවා.
දසත ලංකා පුවත් සමග විශේෂ සම්මුඛ සාකච්ඡාවකට එක්වෙමින් ඔහු අවධාරණය කළේ තම ආයතනයේ ක්රියාකාරීත්වයට දේශපාලන බලපෑම් එල්ලවෙමින් පවතින බවයි.
දේශපාලන මැදිහත් වීම්වලින් ආයතනයේ පරිපාලනයට සේවකයන් බඳවා ගැනීම මෙම තත්ත්වයට හේතුවී ඇති බවයි ඔහු පෙන්වා දෙන්නේ.
එම දේශපාලන බලපෑම් අවම කර ඇඟලුම් කම්හල පවත්වාගෙන යාමට ආරක්ෂාකාරී වටපිටාවක් නිර්මාණය කරන දෙන ලෙසට ඔහු බලධාරීන්ගෙන් ඉල්ලීමක් කරනවා.
පසුගිය මාර්තු මස 30 වනදා රාත්රී මෙම කම්හලට මැර ප්රහාරයක් එල්ලවූ අතර ප්රදේශය නියෝජනය කරන රාජ්ය අමාත්යවරයෙකුගේ හිතවතුන් බව පවසමින් කම්හල් පරිශ්රයට ඇතුලු වූ පිරිසක් විසිනුයි එම මැර ක්රියාව සිදු කර තිබුණේ.
එහිදී කම්හලේ හිමිකරුට අමානුෂික ලෙසට පහරදී ඔහුගේ නිල නිවාසයට සහ වාහනයකට ද හානි කර තිබුණා.
මෙම තත්ත්වය මත ඇඟලුම් කම්හල එම ස්ථානයෙන් ඉවත් කර වෙනත් ප්රදේශයකට රැගෙන යාමටයි එහි බලධාරීන් තීරණය කර ඇත්තේ.
මේ සම්බන්ධයෙන් රජය දැනුවත් කර ඇති අතර ඊට ලැබෙන ප්රතිචාරය මත ඉදිරි තීරණ ක්රියාත්මක කරන බව ද ඇගලුම් කම්හල් හිමිකරු ප්රකාශ කළා.
wpDiscuz
