මාධ්‍යවේදී ප්‍රගීත් එක්නැලිගොඩ මහතා පැහැරගෙන ගොස් අතුරුදන් කිරීම ඇතුළු චෝදනා යටතේ ගිරිතලේ යුද හමුදා කඳවුරේ හිටපු අණදෙන නිලධාරි ෂම්මි කුමාරරත්න මහතා ඇතුළු යුද හමුදා බුද්ධි අංශ නිලධාරීන් තිදෙනෙකුට එරෙහිව නීතිපතිවරයා විසින් පවරනු ලැබූ නඩුවේ සාක්ෂි විභාගය අද (28) කොළඹ මහාධිකරණ ස්ථිර ත්‍රිපුද්ගල විනිසුරු මඬුල්ල හමුවේ දී විභාගයට ගැනුණා.
මහාධිකරණ විනිසුරු ආචාර්‍ය නාමල් බලල්ලේ මහතාගේ සභාපතිත්වයෙන් යුත් එකී ස්ථිර ත්‍රිපුද්ගල විනිසුරු මඬුල්ල හමුවේ දී විත්තිකාර යුද හමුදා නිලධාරීන් එකී පැහැර ගැනීම සිදු කළ සමයේ දී භාවිත කළ ජංගම දූරකථන සම්බන්ධයෙන් දූරකථන විශ්ලේෂණ වාර්තා ඉදිරිපත් කරමින් ප්‍රධාන පෙළේ දූරකථන සමාගම් දෙකක නිලධාරින් දෙදෙනකු සාක්ෂි ලබා දුන්නා.
එකී දූරකථන විශ්ලේෂණ වාර්තාවල සඳහන් අංක සිය සේවාදායකයින් භාවිත කළ ඒවා බව ඔවුන් පිළිගන්නා නමුත් දූරකථන කුළුණු සහිත පැමිණිල්ල ඉදිරිපත් කර තිබෙන සිතියම් පිළිනොගන්නා බව විත්තිය වෙනුවෙන් පෙනී සිටින ජනාධිපති නීතිඥ අනිල් සිල්වා, ජනාධිපති නීතිඥ අනුජ ප්‍රේමරත්න යන මහත්වරුන් ඇතුළු නීතිඥ මඩුල්ල විනිසුරු මඩුල්ලට ප්‍රකාශ කළා.
රජයේ ජ්‍යේෂ්ඨ අධිනීතිඥ උදාර කරුණාතිලක මහතාගේ මෙහෙයවීමෙන් එම දූරකථන සමාගම් නිලධාරින් සාක්ෂි ලබා දුන් අතර වැඩිදුර සාක්ෂි විභාගය ලබන දෙසැම්බර් මස 06 වැනිදා තෙක් කල් තැබුණා.
