මොරවක, කොස්නිල්ගොඩ රජයේ රෝහලේ කොවිඩ් ප්‍රතිකාර මධ්‍යස්ථානයට කඩා වැදුණු සුනඛයෙකු හේතුවෙන් මහත් කලබලකාරී තත්ත්වයක් හටගෙන තිබෙනවා.
අදාළ සුනඛයා එහි ප්‍රතිකාර ලබමින් සිටි කොවිඩ් ආසාදිත කාන්තාවන් තිදෙනෙකු සපා කා ඇති බව යි වාර්තා වන්නේ.
සුනඛයා කළහකාරී ලෙස හැසිරෙන අවස්ථාවේ දී ඇතැම් කොවිඩ් රෝගීන් ඇඳවල් මත නැග සිය ජීවිත බේරාගැනීම සඳහා මහත් හඬින් කෑ කෝ ගසා ඇති බව සිද්ධිය ඇසින් දුටුවන් සඳහන් කළා.
මේ අවස්ථාවේ දී විදේශගතව සිට පැමිණි කාන්තාවන් 18 දෙනෙක් ඇතුළු 38 දෙනෙක් එහි ප්‍රතිකාර ලබමින් සිට ඇති අතර තවත් පිරිසක් නේවාසික ප්‍රතිකාර අවසන් කර සිය නිවෙස් වෙත යාම සදහා සූදානමින් සිට තිබෙන බව සඳහන්.
ඒ අනුව ඔවුන්ගේ පවුල්වල සාමාජිකයින් ද රෝහල් භූමීයේ රැදී සිට ඇති බව පැවසෙනවා.
අවසානයේ රෝහල් සේවකයින් ඇතුළු පිරිස දැඩි වෙහෙසක් දරා සුනඛයා රෝහල් වාට්ටුවෙන් එළවා දමා තිබෙන අතර ඒ අසළ මාර්ගයේ සිටි පිරිස සුනඛයාට ජලභීතිකාව ඇති බවට සැක කරමින් එම සත්ත්වයාට පහර දී මරා දහමා තිබෙනවා.
සුනඛයා ප්‍රතිකාර මධ්‍යස්ථානයට ඇතුළු වූ අයුරු කිසිවෙකුට නිරීක්ෂණය වී නැහැ.
