ඉන්ධන මිල ඉහළ යාම සැලකිල්ලට ගනිමින් හෙට (14) රාත්රියේදී බස් ගාස්තු සංශෝධනයක් සිදුකිරීමට බලාපොරොත්තු වන බව ප්රවාහන අමාත්ය දිලුම් අමුණුගම මහතා පවසයි.
පෞද්ගලික බස්රථ හිමියන්ගේ සංගම් නියෝජිතයින් සමග අද පැවති සාකච්ඡාවකින් අනතුරුව අමාත්යවරයා පැවසුවේ බස් ගාස්තු සංශෝධනය පිළිබඳ හෙට කැබිනට් මණ්ඩලයටද කරුණු ඉදිරිපත් කර තීන්දුව ප්රකාශයට පත්කරන බවය.
ලංකා අයි.ඕ.සී. සමාගම හා ලංකා ඛනිජතෙල් නීතිගත සංස්ථාව ඉන්ධන මිල ගණන් වාර්තාගත අගයකින් ඉහළදැමීම සිය කර්මාන්තයට දැඩි බලපෑමක් එල්ල කර ඇතැයි බස් රථ හිමියන්ගේ සංගම් පෙන්වා දෙයි.
ඔවුන් පවසන්නේ සිය කර්මාන්තය පවත්වාගෙන යාමට රජය ඉන්ධන සහනාධාරයක් ලබානොදෙන්නේ නම් බස් ගාස්තු සංශෝධනයක් සිදුකිරීමට සිදුවන බවය.
ඒ අනුව පෞද්ගලික බස් රථ හිමියන් මුහුණදී ඇති ගැටලු පිළිබඳව සාකච්ඡා කිරීම සඳහා ප්රවාහන අමාත්ය දිලුම් අමුණුගම මහතා සහ බස් රථ හිමියන්ගේ සංගම් නියෝජිතයින් අතර සාකච්ඡාවක් ප්රවාහන අමාත්යාංශයේදී අද පැවැත්වුණි.
ප්රවාහන අමාත්ය දිලුම් අමුණුගම මහතා,
“ප්රායෝගිකව ඉන්ධන සහනාධාරයක් ලබාදීම ක්රියාත්මක කළ නොහැකි තත්ත්වක තියෙනවා කියන එක තමයි අපේ සාකච්ඡාවේ සහ බස් හිමියනුත් දරණ මතය වෙන්නේ. ඉතින් ඒ අනුව අපි යම් සංශෝධයක් පිළිබඳව සකච්ඡා කෙරුවා. හෙට දිනයේ අපි කැබිනට් මණ්ඩලයටත් අපි ඉදිරිපත් කරලා. බොහෝ දුරට ගාස්තු සංශෝධනයක් හෙට රාත්රියේ. මෙවැනි විශාල මිලකින් බලාපොරොත්තු නොවූ ඩීසල් මිල වැඩිවීමක් රු 55කින් වැඩිවුණා. එතකොට මේ ගාස්තුවට බස් ධාවනය කරන්න බැහැ. බොහෝවිට සංශෝධිත මිල ගණන් හෙට. ජනතාවට බරක් වෙන බව අපි දන්නවා”
ප්රශ්නය – ඒ කියන්නේ ඇමතිතුමා දැන් කීයකින්ද අවම ගාස්තුව වැඩිවෙන්නේ ?
ප්රවාහන ඇමති – “අවම ගාස්තුව රු.2 කින් වගේ වැඩිවෙයි”
ප්රශ්නය – රු.17 නේ දැන් තියෙන අවම ගාස්තුව එහෙම වුණොත් ඒක රු.19 වෙන එකද වෙන්නේ?
ප්රවාහන ඇමති – “රු.19 හෝ රු.20 වෙන්න පුළුවන්. දුර ගමන්වලට අපි ඔය කියන රුපියල් 02කට වැඩිය ටිකක් අඩුවෙන්… ඔය කියන ගානට ගියොත් අවසාන ගාස්තුව විශාල එකක් වෙනවා. අවම ගාස්සතුව සංශෝධනය කරනවා.”
කෙසේ වෙතත් අද පැවති සාකච්ඡාවේදී එළඹි තීරණවලින් බස් කර්මාන්තය පවත්වාගෙන යා නොහැකි බවට සමස්ත ලංකා පෞද්ගලික බස් හිමියන්ගේ සංගමය චෝදනා කරයි.
මේ අතර අද මධ්යම රාත්රියට පෙර සිය ගැටලු විසඳීමට පියවර නොගන්නේනම් අද මධ්යම රාත්රියේ සිට ධාවනයෙන් ඉවත් වන බව සමස්ත ලංකා පෞද්ගලික බස් රථ වෘත්තිකයන්ගේ පොදුජන සේවක සංගමය පවසයි.
