බීමතින් යතුරු පැදියක් ධාවනය කිරීමේ චෝදනාවට වරදකරු වූ ශ්රී ලංකා පොදුජන පෙරමුණේ ගඟ ඉහළ කෝරළේ ප්රාදේශීය සභාවේ හිටපු මන්ත්රීවරයකුට මාස දෙකක බරපතළ වැඩ සහිත සිර දඬුවමක් නියම කර තිබෙනවා.
ගම්පොල මහේස්ත්රාත් අධිකරණය මෙම නියෝගය නිකුත් කළ අතර සැකකරුට රුපියල් 75,000ක දඩයක් ද නියම කළ බවයි අප වාර්තාකරුවන් සඳහන් කළේ.
2018 වසරේ සිට වරින් වර අධිකරණය මඟ හැරීම හේතුවෙන් වරෙන්තු නිකුත් වී සිටියදී පොලිසිය විසින් අත්අඩංගුවට ගෙන අධිකරණයට ඉදිරිපත් කළ අවස්ථාවේදී ඔහුට මෙලෙස දඬුවම් නියම වී තිබෙනවා.
මෙලෙස දඬුවම් නියම වී ඇත්තේ ගම්පොල උඩපලාත ප්රාදේශීය ලේකම් කොට්ඨාසයට අයත් ගම්පොල වසමේ සමෘද්ධි සංවර්ධන නිලධාරිවරයා වශයෙන් කටයුතු කළ පොදුජන පෙරමුණේ ගඟ ඉහළ කෝරළේ ප්රාදේශීය සභාවේ හිටපු මන්ත්රීවරයකුටයි.
2018 වසරේ සැප්තැම්බර් 25 වැනිදා රියදුරු බලපත්රය, ආදායම් බලපත්රය රක්ෂණ සහතිකයක් නොමැතිව බීමතින් යතුරු පැදියක් පැදවීමේ චෝදනා මත ගම්පොළ පොලිසිය විසින් විත්තිකරුට එරෙහිව නඩු පවරා තිබුණා.
2018 වසරේදී විත්තිකරුට එරෙහිව නඩු පැවරූ විට ඔහු අදාළ චෝදනාවන්ට තමන් නිවැරදිකරු බව පැවසීම හේතූවෙන් නඩු විභාගය ආරම්භ කර තිබුණා.
නඩු විභාගය අතරතුර විත්තිකරු අධිකරණයය මඟහැරීම හේතූවෙන් ඔහු අත්අඩංගුවට ගෙනන අධිකරණයට ඉදිරිපත් කරන ලෙස අවස්ථා කිහිපයකදීම වරෙන්තු නිකුත් කළ අතර නඩු විභාගය වසර 05ක කාලයක් පුරා පැවැත්වීමට ද සිදුවූ බව සඳහන්.
මේ සම්බන්ධයෙන් පැවැති නඩු විභාගයේදී සමෘර්ධි නියාමකවරුන් සඳහා රජයෙන් ලබාදී තිබු මෙම යතුරුපැදිය සඳහා ආදායම් බලපත්රය, රක්ෂණ සහතිකය මෙන්ම විත්තිකරුගේ රියදුරු බලපත්රයද නොමැතිව ඔහු බීමතින් යතුරු පැදිය පැදවා ඇති බව මෙන්ම විත්තිකරුට මේ දක්වාම රියදුරු බලපත්රයද නොමැති බවද අනාවරණය වී තිබෙනවා.
දීර්ඝ නඩු විභාගය අවසානයේදී අදාළ චෝදනාවන්ට විත්තිකරු වරදකරු බව තීරණය කළ මහෙස්ත්රාත්වරයා අදාළ දඬුවම් නියම කර තිබෙනවා.
