ඔටෝ මොබයිල් සහ විද්යුත් උපකරණ කර්මාන්ත සම්බන්ධයෙන් පූර්ව අයවැය සාකච්ඡාවක් කම්කරු අමාත්ය සහ ආර්ථික සංවර්ධන නියෝජ්ය අමාත්ය ආචාර්ය අනිල් ජයන්ත ප්රනාන්දුගේ ප්රධානත්වයෙන් ජනාධිපති ලේකම් කාර්යාලයේදී ඊයේ (16) පැවැත් වුණා.
ජනාධිපති අනුර කුමාර දිසානායක ප්රමුඛ රජය ගෙන යන ආර්ථික සංවර්ධන වැඩපිළිවෙළ සඳහා ඔටෝ මොබයිල් සහ විද්යුත් උපකරණ ආනයනකරුවෝ සිය පූර්ණ සහාය ලබාදෙන බව මෙහිදී කියා සිටියා.
වත්මන් ආණ්ඩුව විසින් වාහන ආනයනය සම්බන්ධයෙන් ගනු ලැබූ තීරණය හේතුවෙන් වාහන ආනයන ක්ෂේත්රය පුළුල් වූ බව සඳහන් කළ වාහන ආනයනකරුවෝ ඉදිරි අයවැය සඳහා ඵලදායි යෝජනා කිහිපයක් ද මෙහිදී ඉදිරිපත් කළා.
විද්යුත් උපකරණ ආශ්රිත නිෂ්පාදන ආනයනකරුවන් ක්ෂේත්රය තුළ මුහුණ දෙන ගැටලු පිළිබඳව ද මෙහිදී සාකච්ඡා කෙරුණු අතර, විශේෂයෙන් සංවිධානාත්මක කණ්ඩායම් විසින් බදු ගෙවීමකින් තොරව හොර රහසේ මෙරටට ගෙන එනු ලබන විද්යුත් උපකරණ හේතුවෙන් වෙළඳපොළ අසමතුලිතතාවක් මෙන්ම, භාණ්ඩවල ගුණාත්මකභාවයේ අඩුවක් දක්නට ලැබෙන බවද විද්යුත් උපකරණ ආනයනකරුවෝ මෙහිදී පෙන්වා දුන්නා.
එමඟින් රජයට විශාල බදු ආදායමක් අහිමි වන බවත්, පාරිභෝගිකයින්ට භාණ්ඩවල ප්රමිතිය පිළිබඳ ගැටලු මතුව ඇති බවත් පෙන්වා දුන් ඔවුහු මේ පිළිබඳ කඩිනම් ක්රියාමාර්ග ගන්නා ලෙස ද ඉල්ලා සිටියා.
ක්ෂේත්රයේ ප්රවීණයන් විසින් ලබාදුන් සියලු ඵලදායි යෝජනා ඉදිරි අයවැය සකස් කිරීමේදී යොදා ගන්නා බවත්, ප්රමිතියෙන් යුතු ගුණාත්මක භාණ්ඩ ආනයනය කිරිම සදහා අවශ්ය නම් නව නීති ගෙන ඒමට කටයුතු කරන බවත්, කම්කරු අමාත්ය සහ ආර්ථික සංවර්ධන නියෝජ්ය අමාත්ය ආචාර්ය අනිල් ජයන්ත ප්රනාන්දු මෙහිදී සඳහන් කළා.
බදු දැලෙන් රිංගා භාණ්ඩ ආනයනය කරන සංවිධානාත්මක කණ්ඩායම්වලට එරෙහිව නීතිය ක්රියාත්මක කරන බවද අමාත්යවරයා වැඩිදුරටත් සඳහන් කර සිටියා.
