බංගලියන්ට දෙවන විස්සයි විස්සෙන් පහසු ජයක්

සංචාරක ශ්‍රී ලංකා කණ්ඩායම සමග පැවති දෙවන විස්සයි විස්ස තරගය ජය ගන්නට බංග්ලාදේශ කණ්ඩායම අද සමත් වුණා.

සිල්හෙට් හිදී පැවති මෙම තරගය බංග්ලාදේශය ජයග්‍රහණය කළේ කඩුලු 08කින්.

තරගයේ පළමුව පන්දුවට පහරදුන් ශ්‍රී ලංකාව නියමිත පන්දුවාර 20 තුළ කඩුලු 05ක් දැවී ලකුණු 165ක් රැස් කළා.

එහිදී ශ්‍රී ලංකා ඉනිම වෙනුවෙන් කුසල් මෙන්ඩිස් ලකුණු 36ක් සහ කමිදු මෙන්ඩිස් ලකුණු 37ක් රැස් කිරීමට සමත් වුණා.

නායක චරිත් අසලංක ලකුණු 28 රැස් කළා.

මේ අතර ශ්‍රී ලංකා ඉනිමේ හයවන කඩුල්ලට අර්ධ ශතක සම්බන්ධතාවක් ගොඩගගන්නට ඇන්ජලෝ මැතිව්ස් සහ දසුන් ශානකට හැකියාව ලැබුණා.

පන්දු යැවීමේ දී මෙහෙදි හසන්, සෞම්‍ය සකාර්, ටස්කින් අහමඩ් සහ මුස්ටර්ෆිසූර් රෙහෙමාන් එක් කඩුල්ල බැගින් බිද දැමුවා.

අනතුරුව පිළිතුරු ඉනිම ආරම්භ කළ බංග්ලාදේශය ආරම්භ පිතිකරුවන් යුගළයට සාර්ථක ආරම්භයක් ලබාදීමට කටයුතු කළා.

ඒ අනුව ලිටන් ඩාස් ලකුණු 36ක් සහ සෞම්‍ය සකාර් ලකුණු 26ක් රැස් කිරීමට සමත් වුණා.

ඔවුන් දෙදෙනාගේ දැවීයාමෙන් පසු පිටියේ එක් වූ තව්හිඩ් රිඩෝයි සහ නායක නජුමුල් සන්ටෝ බංග්ලාදේශ ජයග්‍රහණයට මාවත සකසා ගත්තා.

එහිදී රිඩෝයි ලකුණු 32ක් රැස්කළ අතර සන්ටෝ ලකුණු 53ක් රැස්කරමින් බංග්ලාදේශ ජයග්‍රහණයේ නියමුවා වුණා.

ඒ අනුව බංග්ලාදේශය පන්දුවාර 18යි පන්දු 01ක් තුළ කඩුලු 02ක් පමණක් දැවී ලකුණු 166ක ඉලක්කය පසුකර යමින් තරගය ජයගත්තා.

බංග්ලාදේශ ඉනිමේ වාර්තා වූ කඩුලු දෙකේම හිමිකරුවා බවට පත් වුණේ වේග පන්දු යවන ක්‍රීඩක මතීෂ පතිරණයි.

මෙම ජයග්‍රහණයත් සමග තරග තුනකින් සමන්විත විස්සයි විස්ස තරගාවලිය කණ්ඩායමේ දෙකම එක් තරග බැගින් ජයගෙන සම තත්ත්වයේ පසුවනවා.