එක්සත් ජාතීන්ගේ ළමා අරමුදල (යුනිසෙෆ්) පවසන්නේ එක්සත් ජනපදය, ඊශ්‍රායලය සහ ඉරානය අතර තීව්‍ර වන යුද ගැටුම් හේතුවෙන් මැද පෙරදිග පුරා මිලියන සංඛ්‍යාත දරුවන්ට ව්‍යසනකාරී තත්වයක් නිර්මාණය කෙරෙන බවයි.
පසුගිය පෙබරවාරි 28 වන දින සිට, ප්‍රචණ්ඩත්වයෙන් ළමුන් 1,100 කට වැඩි පිරිසක් තුවාල ලබා හෝ මියගොස් ඇති බවත් යුනිසෙෆ් සංවිධානය පවසනවා.
ඉරානයේ ළමුන් 200 ක්, ලෙබනනයේ ළමුන් 91 ක්, ඊශ්‍රායලයේ ළමුන් හතර දෙනෙක් සහ කුවේටයේ එක් ළමයෙක් යුදමය තත්වයන් නිසා ජීවිතක්ෂයට පත්ව ඇති බවයි එම සංවිධානය පෙන්වා දෙන්නේ.
එමෙන්ම මෙම තත්ත්වය හේතුවෙන් මිලියන සංඛ්‍යාත ළමුන් පාසල් අධ්‍යාපනය ද මග හැරී ඇති බවත්, ලක්ෂ සංඛ්‍යාත පිරිසක් අඛණ්ඩ බෝම්බ හෙලීම් මගින් අවතැන් වී ඇති බවත් එම සංවිධානය නිකුත් කළ නිවේදනයේ සඳහන්.
