එළඹෙන ජනාධිපතිවරණයට ශ්‍රී ලංකා පොදුජන පෙරමුණෙන් තරග කරන අපේක්ෂකයා වෙන ම අපේක්ෂකයෙකු ලෙස ඉදිරිපත් කිරීමට තීරණය කර තිබෙනවා.
මෙම තීරණය මීට ටික වේලාවකට පෙර (29) පොදුජන පෙරමුණේ දේශපාලන මණ්ඩලය විසින් ගනු ලැබූ බවයි පක්ෂ මහලේකම් සාගර කාරියවසම් සඳහන් කර සිටියේ.
විශේෂ දේශපාලන මණ්ඩල රැස්වීමෙන් අනතුරුව පිටතට පැමිණෙමින් මහලේකම්වරයා මේ බව සඳහන් කර සිටියා.
එහිදී මාධ්‍යවේදීන් විමසා සිටියේ පොහොට්ටුවෙන් එලෙස ඉදිරිපත් කරන වෙනම අපේක්ෂකයා කවුරුන් දැයි තීරණය කළා දැයි යන්නයි.
නමුත් ඊට පිළිතුරු ලබාදෙමින් මහලේකම්වරයා සඳහන් කළේ; එම පුද්ගලයා කවුරුන් දැයි අද දිනයේ දී තීරණය නොකළ බවත්, පොහොට්ටුවට ජයග්‍රහණය කළ හැකි අපේක්ෂකයෙකු ඉදිරිපත් කිරීමට ඒකමතික ව තීරණය කෙරුණු බවයි.
අද පස්වරුවේ විජේරාමේ පිහිටි හිටපු ජනාධිපති මහින්ද රාජපක්ෂගේ නිල නිවසට පොහොට්ටුවේ දේශපාලන මණ්ඩල සභිකයින් රැස් වුණා.
ඒ එළඹෙන ජනාධිපතිවරණයට තරග කරන සිය අපේක්ෂකයා සම්බන්ධයෙන් වන අවසන් තීන්දුව ගැනීමටයි.
මෙම අවස්ථාවට පක්ෂයේ මහ ලේකම් සාගර කාරියවසම් ඇතුළු ජ්‍යේෂ්ඨ පක්ෂ සාමාජිකයින් රැසක් ද එක් ව සිටියා.
මෙම තීන්දුවත් සමග එළඹෙන ජනාධිපතිවරණයේ දී පොහොට්ටුවේ සහාය කිසිදු ලෙසකින් වත්මන් ජනපති රනිල් වික්‍රමසිංහ හට හිමි නොවනු ඇති.
