ඊයේ (30) දින පුද්ගලයෙකුට මරණ තර්ජන එල්ල කළ පුද්ගලයෙකු ගිනි අවියක් සමග අත්අඩංගුවට ගෙන තිබෙනවා.
මෙම සැකකරු බේරුවල ධීවර වරායේ දී ව්‍යාපාරිකයෙකුට ගිනිඅවි පෙන්වා තර්ජනය කර ඇති බවත්; ඔහුව ‘රන් මල්ලී’ නමැති අන්වර්ථ නාමයෙන් හඳුන්වන බවත් බේරුවල පොලිසිය පවසනවා.
සැකකරු දින කිහිපයකට පෙර බේරුවල ධීවර වරායේ ආපණශාලාවේ දී ගිනි අවියක් පෙන්වා මත්ස්‍ය ව්‍යාපාරිකයෙකුට මරණ තර්ජනය කළ බවටයි පොලිසියට පැමිණිල්ලක් ලැබී ඒ සම්බන්ධයෙන් විමර්ශන ආරම්භ කර ඇත්තේ.
පොලිස් විමර්ශන ක්‍රියාත්මක වීමත් සමග සැකකරු ප්‍රදේශයෙන් පලා ගොස් ඇති අතර ඔහු ව බේරුවල – හෙරලත්තුඩුව ප්‍රදේශයේ දී පොලිස් අත්අඩංගුවට ගැනුණා.
මොහු 30 හැවිරිදි වියැති හිටපු යුද හමුදා සෙබළෙකු වන අතර කලක් ප්‍රදේශයේ හිටපු රාජ්‍ය අමාත්‍යවරයෙකුගේ ප්‍රබල ආධාරකරුවෙකු ද වන බවත් හෙළි ව තිබෙනවා.
සැකකරුට මෙම ගිනිඅවිය කාගෙන් කුමන කටයුත්තක් සඳහා ලැබුණේ ද යන්න සොයා බැලීමට විමර්ශන ආරම්භ කර ඇති අතර ඔහු ව අද (30) කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
