පැවති අයහපත් කාලගුණයත් සමඟ දොඩංගොඩ, ගමගොඩ, වත්තෙගෙදර ප්‍රදේශයේ පිහිටි නිවසක අද (29) අලුයම් කාලයේ අසල තිබූ දෙල්ගසක් කඩා වැටී තිබෙනවා.
මේ හේතුවෙන් නිවස සම්පූර්ණයෙන්ම විනාශ වී ඇති බවයි වාර්තා වුණේ.
කෙසේ වෙතත් අනතුරින් නිවසේ සිටි පුද්ගලයින්ට කිසිඳු හානියක් සිදුව නොමැති අතර, නිවැසියන්ගේ ජීවිත බේරාගෙන ඇත්තේ නිවසේ සුරතලයට ඇති කළ සුනඛයා බවයි අප වාර්තාකරු සඳහන් කළේ.
නිවෙස් හිමියා පවසන්නේ අද (29) අලුයම් කාලයේ තමන් නිදා සිටිය දී සුනඛයා කාමරයේ ඇඳ ළඟට පැමිණ මදුරු දැල කටින් ඉරාදමා තමාගේ සරමෙන් ඇද තමන්ව අවිදි කළ බවයි.
පසුව තමන් දරුවන් සහ බිරිඳ නිදාසිටි කාමරය වෙත ගිය බවත් එම කාමරයට ගොස් සුළු වේලාවක් ගතවන විට දෙල් ගස තමා නිදාසිටි කාමරයට කඩා වැටුණු බවයි නිවෙස් හිමියා සඳහන් කළේ.
ඒ, මොහොත වන විටත් නිවසේ සියලු දෙනාම සුනඛයාගේ හැසිරීම නිසා අවදි වී සිට ඇති අතර, ඒ හේතුවෙන් තමන්ගේ ඇතුළු පවුලේ අනෙකුත් සාමාජිකයින්ගේ ජීවිත බේරාගැනීමට හැකි වූ බව නිවෙස්හිමියා වැඩිදුරටත් පවසා සිටියා.
