රුපියල් තිස් දෙකෝටි පහළොස් ලක්ෂ අනූ දහසක් වටිනා “කුෂ්” මත්ද්‍රව්‍ය තොගයක් , මෙරටට රැගෙන එමින් සිටි විදේශීය ගුවන් මගීන් යුවළක් අද (10) උදෑසන කටුනායක ගුවන් තොටුපොළ රේගු නිලධාරීන් සහ රේගු මත්ද්‍රව්‍ය පාලන අංශයේ නිලධාරීන් පිරිසක් විසින් අත්අඩංගුවට ගෙන තිබෙනවා.
මොවුන් දෙදෙනා කැනඩාවේ ඇල්බර්ටා ප්‍රදේශයේ පදිංචිකරුවන් වන අතර 25 හැවිරිදි පිරිමි පුද්ගලයා එරට පෞද්ගලික ආරක්ෂක ආයතනයක සේවය කරන්නෙක් .
29 හැවිරිදි ඔහුගේ බිරිඳ තවමත් රැකියාවක් සොයමින් සිටින්නියක් බව අනාවරණය වී තිබෙනවා.
ඔවුන් අද දින උදෑසන 10.45 ට තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔවුන් විසින් රැගෙන ආ ගමන් මලු 02 ක් තුළ මෙම ” කුෂ්” මත්ද්‍රව්‍ය කිලෝ ග්‍රෑම් 32 ග්‍රෑම් 159 ක ප්‍රමාණය පැකැට් 23 ක් තුළ අසුරා සගවා ගෙන පැමිණ ඈති බව දසත news ගුවන් තොටුපොළ වාර්තාකරු සඳහන් කළේ.
මේ පිළිබද වැඩිදුර විමර්ශන කටයුතු සදහා මොවුන් දෙදෙනා සහ ඔවුන් රැගෙන ආ මත්ද්‍රව්‍ය තොගය, කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට පියවර ගෙන තිබෙනවා .
