බදුල්ල කොළඹ ප්රධාන මාර්ගයේ උඩුවර 7 කණුව ප්රදේශයේ සිදු වූ නායයාමේ සුන්බුන් ඉවත් කිරීමේදී මළ සිරුරක කොටස් හමුවී තිබෙනවා.
ආපදා කළමනාකරණ නිලධාරීන් ඊයේ සඳහන් කර තිබුණේ මෙම නායයාමෙන් අතුරුදන් වූවන් කිසිවෙකු පිළිබඳ ඒ මොහොත වන විට තොරතුරු ලැබී නොතිබූ බවයි.
ඊට හේතුව වී ඇත්තේ නායයාම සිදුවී ඇත්තේ ජනාවාස අඩු ප්රදේශයක වීම සහ ඒ මොහොතේ එම ප්රදේශයේ මාර්ගයේ කිසිවෙකු නොසිටීමයි.
පස් කන්දක් නායගොස් අවහිරව තිබූ මාර්ග කොටස යථා තත්වයට පත්කිරීම අද දිනයේ ද සිදු වූ අතර අප වාර්තාකරු සඳහන් කළේ මෙම පස් ඉවත් කිරීමේදී මෘත දේහයක හිස් කබලක් සහ අස්ථි කොටස් හමු වී ඇති බවයි.
නාය ගිය ස්ථානයේ තිබූ සොහොනකින් මෙම හිස් කබල සහ අස්ථි කොටස් මතුවන්නට ඇති බවටයි සැක කෙරෙන්නේ.
මේ පිළිබදව අධිකරණයට කරුණු වාර්තා කිරීමට පොලිසිය පියවර ගෙන තිබෙනවා.
මෙම මාර්ගය අවහිර කරමින් වැටී තිබූ පස් ඉවත් කර මාර්ගය සකස් කර ඇතත් වාහන ගමනා ගමනයට පෙර ජාතික ගොඩනැගිලි පර්යේෂණ සංවිධානයේ අනුමැතිය ලැබිය යුතු බවයි බදුල්ල දිස්ත්රික් ආපදා කලමනාකරණ ඒකකය ප්රකාශ කළේ.
