නව ඇමැති මණ්ඩලයක් පත් කළ වහාම ශ්‍රී ලංකාව සමග නැවත සාකච්ඡා ආරම්භ කිරීමට සූදානම් බව අන්තර්ජාතික මූල්‍ය අරමුදල (IMF) ප්‍රකාශ කරයි.
නව ආණ්ඩුවක් පිහිටුවීමෙන් අනතුරුව ප්‍රතිපත්තිමය කරුණු සාකච්ඡා කිරීමට සම්පූර්ණයෙන්ම සූදානම් වීමට අවශ්‍ය පරිදි මැයි 9 වැනිදා සිට 23 වැනිදා දක්වා කාලයේදී අන්තර්ජාලය මාර්ගයෙන් දෙපාර්ශ්වය අතර තාක්ෂණික මට්ටමේ සාකච්ඡාවක් ක්‍රියාත්මක වේ. යැයි මසහිරෝ නොසාකි පෙන්වා දෙයි.
අන්තර් ජාතික මූල්‍ය අරමුදලේ ණය වැඩසටහනට සහභාගි වීමට ශ්‍රී ලංකා රජය විසින් කැමැත්ත පළ කිරීමෙන් අනතුරුව පසුගිය අප්‍රේල් 18 වැනිදා සිට 24 වැනිදා දක්වා හිටපු මුදල් ඇමැති අලි සබ්‍රි එක්සත් ජනපදයේ වොෂින්ටනයේදී මූල්‍ය අරමුදලේ ප්‍රධානීන් සමග විශේෂ සාකච්ඡා වටයකට සහභාගි විය. එහිදී සාකච්ඡාවට බඳුන් වූ කරුණු මත පදනම්ව පසුගිය සතියේ පාර්ලිමේන්තුවේදී විශේෂ ප්‍රකාශයක් කරමින් හිටපු මුදල් ඇමැති අලි සබ්‍රි පෙන්වා දුන්නේ ණය වැඩසටහන ක්‍රියාත්මක වී ශ්‍රී ලංකාවට ණය පහසුකමින් කොටසක් ලබාගැනීම සඳහා තවත් මාස 6ක් පමණ කාලයක් ගතවනු ඇති බවයි.
