නුවරඑළියේ මහ නගර සභාවේ බවුසරයට පුද්ගලයින් දෙදෙනෙකු යට වී තුවාල ලබා තිබෙනවා.
අප ප්‍රාදේශීය වාර්තාකරු පැවසුවේ මෙම රිය අනතුරින් මෝටර් රථයකට ද හානි සිදු ව ඇති බවයි.
නුවරඑළිය මුලස්ථාන පොලිස් ස්ථානය ඉදිරිපිට දී මෙම අනතුර සිදු ව ඇති අතර; ගලි බවුසරයකට ප්‍රධාන මාර්ගයේ සුදු ඉර මතින් මාර්ගය හරහා මාරු වු පදිකයින් දෙදෙනකු මෙලෙස අනතුරට ලක් ව රෝහල්ගත කර තිබෙනවා.
ඔවුන් දෙදෙනා ම බරපතළ තුවාල ලබා ඇති බවයි වාර්තා වන්නේ.
අද (12) පෙරවරු 10.30ට පමණ මෙම අනතුර සිදු ව තිබෙනවා.
හාවාඑළිය ප්‍රදේශයේ සිට නුවරඑළිය මහ නගර සභාව දක්වා අධික වේගයෙන් ධාවනය කර ඇති මෙම බවුසරය නුවරඑළිය දිස්ත්‍රික් ලේකම් කාර්යාල මාර්ගයේ ගාල් කර තිබු මොටර් රථයක ද ගැටී පදිකයින් දෙදෙනා ද යට කරගෙන විත් ප්‍රධාන
මාර්ගය අබියස පිහිටි පැති බැම්මක ගැටී නතර ව ඇති බවයි වාර්තා වන්නේ.
අනතුරෙන් ගලි බවුසරයට දැඩි අලාභ හානි සිදු ව ඇති අතර, බවුසර් රථයේ හදිසියේ ඇති වූ කාර්මික දෝෂයක් අනතුරට හේතුව වී ඇති බවයි අනතුර පිළිබඳ ව සිදු කළ මූලික විමර්ශනවල දී හෙළි ව ඇත්තේ.
බවුසර් රථයේ රියදුරා පොලිසිය අත්අඩංගුවට ගෙන තිබෙනවා.
