මද්දකට හසු කර මරා මස් කිරීමට සූදානම් කර තිබියදී දඩයක්කරුවන් පිරිසක් විසින් දමා ගොස් තිබු මුවෙකු අධිකරණයට ඉදිරිපත් කිරීමෙන් පසු එම මුවාගේ සිරුර වළ දමන ලෙසට පොලිසියට නියෝග කර තිබෙනවා.
කැබිතිගොල්ලෑව පොදු සුසාන භූමියේදී මුවාගේ සිරුර වළ දමන ලෙසටයි කැබිතිගොල්ලෑව මහේස්ත්‍රාත් කසුන් කංචන දසනායක මහතා කැබිතිගොල්ලෑව මූලස්ථාන පොලිසියට නියෝග කළේ.
පාළුහල්මිල්ලවැව ප්‍රදේශයේ කැලෑවක ගසක එල්ලෙමින් තිබියදී කැබිතිගොල්ලෑව මූලස්ථාන පොලිසියේ නිලධාරීන් විසින් ඊයේ (14) උදැසන 9ට පමණ මුවා ගේ සිරුර සොයාගෙන තිබුණා.
දඩයක්කරුවන් විසින් මිය ගිය මුවා ගසක එල්ලා මස් කිරීමට සූදානම් කර තිබියදී පොලිසිය විසින් එලෙස සොයාගෙන තිබූ අතර පොලිසිය පැමිණෙන බවට ලැබුණු තොරතුර හේතුවෙන් දඩයක්කරුවන් එම ස්ථානයෙන් පළා ගිය බවත් මුවාගේ සිරුර පමණක් තම භාරයට ගත් බවත් පවසා පොලිසිය අධිකරණයට මුවාගේ සිරුර ඉදිරිපත් කර තිබෙනවා.
ඒ අනුව කරුණු සලකා බැලූ කැබිතිගොල්ලෑව මහේස්ත්‍රාත්වරයා නියෝග කළේ අධිකරණයේ විශේෂ නිලධාරියෙකුගේ අධීක්ෂණය යටතේ මුවාගේ සිරුර කැබිතිගොල්ලෑව පොදු සුසාන භූමියේදී වළ දමන ලෙසටයි.
