සංචාරක ශ්රී ලංකා කණ්ඩායමට එරෙහිව සත්කාරක දකුණු අප්රිකානුවෝ අද (05) ආරම්භ වූ දෙවැනි හා අවසන් ටෙස්ට් තරගයේ පළමු දිනය නිමාවන විට කඩුලු 07ක් දැවී ලකුණු 269ක් ලබා ගත්තා.
Gqeberha ක්රීඩාංගණයේ දී මෙරට වේලාවෙන් පස්වරු 1.30ට ආරම්භ වූ දෙරට අතර තරගයේ කාසියේ වාසිය හිමිවූයේ දකුණු අප්රිකානු නායක ටෙම්බා බවුමා හටයි.
බවුමා පළමුව පිතිකරණය තෝරාගත්තා.
මෙම තණතිල්ල වේග පන්දු යවන්නන්ගේ නිජබිමක් ලෙස සැලකෙන ක්රීඩාංගණයක්.
එබැවින් අද වේග පන්දු යවන්නන් හට වැඩි වාසියක් ඇති වේවි යැයි සිතුව ද, එය සිතූ තරම් පහසු නොවූයේ සිය මව්බිමේ දී දකුණු අප්රිකානුවන් කවර ගණයේ පන්දු යවන්නෙකුට වුව ද ප්රවේසම්කාරී අයුරින් පිතිහරඹය ක්රියාත්මක කිරීම හේතුවෙන්.
දකුණු අප්රිකාවේ පළමු කඩුලු 03 ලකුණු 50කට අඩුවෙන් දැවී ගිය ද නායකත්ව ඉනිමක් ක්රීඩා කරමින් බවුමා ලකුණු 78ක් ලබා ගත්තා.
ඔහු දැවී ගියේ අසිත ප්රනාන්දු යොමු කළ පන්දුවක් හමුවේ උඩ පන්දුවක් කුසල් මෙන්ඩිස් වෙත ලබාදෙමින්.
ඉන් අනතුරුව ප්රවේසම්කාරී මෙන් ම තාක්ෂණික පිතිකරණයක නිරත වූ Ryan Rickelton සිය ජාත්යන්තර මංගල ටෙස්ට් ශතකය ශ්රී ලංකාවට එරෙහිව වාර්තා කරගැනීමට සමත් වුණා.
ඔහු ලකුණු 101ක් ලබා සිටියදී ළහිරු කුමාරගේ පන්දුවක් හමුවේ දැවී යන විට එල්ල කර තිබූ හතරේ පහර ගණන 11ක්.
Kyle Verreynne 07 වැනි කඩුල්ල වෙනුවෙන් දිනය නිමාවන විට නොදැවී ලකුණු 48ක් ලබා සිටියා.
අද දිනයේ දී කඩුලු බිඳ දැමීමේ දී ළහිරු කුමාර කඩුලු 03ක්, අසිත ප්රනාන්දු කඩුලු 02ක් සහ එක් කඩුල්ල බැගින් විශ්ව ප්රනාන්දු සහ ප්රභාත් ජයසූරිය විසින් බිඳ හෙලනු ලැබුවා.
අද තරගයේ දී ශ්රී ලංකා පන්දු යවන්නන් හට හිසරදරයක් වූ Ryan Rickelton මෙන් ම තවත් ක්රීඩකයින් දවා ගැනීමට ශ්රී ලංකා පන්දු රකින්නන් හට ලැබුණු අවස්ථා කිහිපයක් ම මගහැරුණේ දුර්වල උඩ පන්දු රැකීම නිසාවෙන්.
හෙට (06) තරගයේ දෙවැනි දිනයයි.
