තීරු බදු නොගෙවා රැගෙන ආ ලැප්ටොප්, ජංගම දුරකථන ඇතුලු උපකරණ තොගයක් නීති විරෝධීව කටුනායක ගුවන්තොටුපලින් පිටතට රැගෙන යාමට උත්සාහ කළ පුද්ගලයන් දෙදෙනෙකු අත්අඩංගුවට ගෙන තිබෙනවා.
රුපියල් කෝටියක් වටිනා ලැප්ටොප් පරිගණක, ජංගම දුරකථන සහ උපාංග ඇතුළු විද්යුත් සන්නිවේදන උපකරණ තොගය සැකකරුවන් දෙදෙනා තීරු බදු නොගෙවා රැගෙන විත් ඇති අතර ඒවා ගුවන් තොටුපළින් පිටතට ගෙන යමින් සිටියදීයි ගුවන් තොටුපොළ පොලිසිය මගින් අත් අඩංගුවට ගෙන ඇත්තේ.
මේ පිළිබඳ කොට්ඨාස බුද්ධි අංශය විසින් කටුනායක ගුවන් තොටුපොළ පොලිසිය වෙත තොරතුරු ලබා දී තිබූ අතර මෙම ව්යාපාරිකයන් දෙදෙනා ගුවන් තොටුපොළ සියලු පරීක්ෂණ මග හැර මෙම භාණ්ඩ තොගය ගුවන් තොටුපොළෙන් පිටතට රැගෙන යමින් සිටි බව සඳහන්.
සැකකාර ව්යාපාරිකයන් දෙදෙනා මෙම විද්යුත් උපකරණ තොගය භාණ්ඩ ප්රවාහනය සදහා ඇති ට්රොලි තුළ අසුරා ගෙන ගුවන් තොටුපොළෙන් පිටතට රැගෙන පැමිණ තිබෙනවා.
ඔවුන් දෙදෙනාගෙන් එක් අයෙකු මාතර හක්මන ප්රදේශයේ පදිංචි 40 හැවිරිදි අයෙක් වන අතර අනෙක් ව්යාපාරිකයා දෙහිවල ප්රදේශයේ පදිංචි 43 හැවිරිදි අයෙක්.
ඔවුන් දෙදෙනා ඊයේ පස්වරුවේ ඩුබායි සිට එමිරේට්ස් ගුවන් සේවයේ EK- 650 දරන ගුවන් යානයෙන් සහ ෆ්ලයි ඩුබායි ගුවන් සේවයේ FZ- 1025 දරන ගුවන් යානාවලින් කටුනායක ගුවන් තොටුපොළ වෙත පැමිණ තිබුණා.
මෙලෙස නීතිවිරෝධීව රැගෙන විත් තිබූ විද්යුත් සන්නිවේදන උපකරණ අතර ලැප්ටොප් පරිගණක 17ක්, ඇපල් ජංගම දුරකථන 47ක්, ලීටර් 01 විස්කි බෝතල් 22ක්, ජේ.බී.එල්. සංගීත උපකරණ 03ක්, ඇපල් ජංගම දුරකථන චාජර් 200ක්, රැහැන් රහිත මයික්රොපෝන් 03ක්, ආරක්ෂිත වර්ණ කැමරා පද්ධති 08ක්, ඇපල් ජංගම දුරකථන උපාංග 55ක් සහ ඇපල් ජංගම දුරකථන බැටරි 39ක් තිබූ බව සඳහන්.
මෙම විද්යුත් උපකරණ තොගය වැඩිදුර විමර්ශන කටයුතු සදහා ගුවන් තොටුපොළ රේගු නිලධාරීන් වෙත භාර දීමට නියමිතව තිබුණා.
