දකුණු තායිලන්තයේ ගිනිකෙළි ගබඩාවක සිදුවූ පිපිරීමකින් ළමුන් තිදෙනෙකු ඇතුළුව පුද්ගලයින් 9 දෙනෙකු මියගොස් තිබෙනවා.
මැලේසියා දේශසීමාවේ සුංගායි කොලොක්හි සිදුවූ පිපිරීමෙන් තවත් පුද්ගලයන් 115 දෙනෙකුට බරපතල තුවාල සිදුවී ඇති බවයි විදෙස් මාධ්ය වාර්තා කළේ.
විශාල පිපිරීම සමග අවට ගොඩනැගිලි සෙලවී, ජනේල කැඩී බිඳී ගිය අතර නිවෙස්වල වහලවල් කඩා වැටී ඇතැයි සඳහන්.
පිපිරීමෙන් නාරාතිවත් පළාතේ නගරයේ විශාල කොටසක් ද විනාශ වී තිබෙනවා.
ගින්න පාලනය කර ඇති අතර මූලික පරීක්ෂණ මගින් අනාවරණ වී ඇත්තේ ගොඩනැගිල්ලේ ඉදිකිරීම් කටයුතු අතරතුර වානේ වෑල්ඩින් කිරීමේදී ගින්න හටගෙන ඇති බවයි.
ගිනිකොනදිග ආසියාවේ ගිනිකෙළි සම්බන්ධ අනතුරු මීට පෙර ද වාර්තා වී තිබෙනවා.
මීට වසර හයකට පමණ පෙර ඉන්දුනීසියාවේ කම්හලක සිදුවූ පිපිරීමකින් 49 දෙනෙකු මිය ගියා. එමෙන්ම මීට වසර 5කට පමණ පෙර උතුරු තායිලන්තයේ සිදු වූ ගිනිකෙළි පිපිරීමකින් එක් කාන්තාවක් මිය ගොස් තවත් 10 දෙනෙකු තුවාල ලැබුවා.
ආරක්ෂාව තහවුරු කරන ලෙසට මහජන බලපෑම් එල්ලවී තිබියදීත්, තායිලන්තයේ මාර්ගවල, ඉදිකිරීම් ස්ථානවල සහ සේවා ස්ථානවල අනතුරු රැසක් වාර්තා වනවා.
