වවුනියාව ප්‍රදේශයේ ත්‍රීරෝද රථ රියදුරකු පැහැරගෙනගොස් යාපනය කෝපායි හි නිවසක රඳවා වදහිංසා කරමින් සිටි කාන්තාවන් තිදෙනකු ඇතුළු 11 දෙනකු ඊයේ (01) දින රාත්‍රියේ අත්අඩංගුවට ගත් බව යාපනය පොලිසිය පවසනවා.
පොලිසිය පැවසූවේ නිවසක රඳවා පුද්ගලයකුට පහරදෙමින් වද හිංසා කරන බවට ලද තොරතුරක් මත සිදුකළ වැටලීමකදී සැකකරුවන් පිරිස හා පැහැරගත් ත්‍රීරෝද රථ රියදුරු සොයාගත් බවයි.
පැහැර ගැනීමෙන් අනතුරුව දැඩි ලෙස පහර කා තුවාල ලබා සිටි වවුනියාව , පූවරසකුලම් ප්‍රදේශයේ පදිංචි 35 හැවිරිදි ත්‍රීරෝද රථ රියදුරු ප්‍රතිකාර සඳහා යාපනය රෝහල වෙත ඇතුළත් කොට තිබෙන බව අප වාර්තාකරු පවසනවා.
පොලිසිය පැවසූයේ ත්‍රිරෝද රථ රියදුරු විසින් විදේශ රටකට යවන බව පවසා පැහැරගැනීමට සම්බන්ධ එක් කාන්තාවකගෙන් මුදල් ලබාගෙන ඇති අතර, එම මුදල් ඉල්ලා සිටි අවස්ථාවේ ගෙවීම පැහැරහැරීම හේතුවෙන් පැහැරගැනීම සිදුකර ඇති බවට මුලිකව අනාවරණය වි ඇති බවයි.
අත්අඩංගුවටගත් කාන්තාවන් පෙරේදා (01) දින උදෑසන කුලී ගමනක් යෑම සඳහා ත්‍රී රෝද රථ රියදුරුට වවුනියාව නගරයට පැමිණෙන ලෙස දන්වා සිට ඇති අතර, එලෙස පැමිණෙමින් සිටියදී වෑන් රථයකින් පැමිණ ඇති සැකකරුවන් පිරිස මෙම පැහැරගැනීම සිදුකොට ඇති බව පොලිසිය පැවසුවා
පැහැර ගැනීම සඳහා යොදාගත් වෑන් රථය හා යතුරු පැදි තුනක් අත්අඩංගුවට ගත් බවත් අත්අඩංගුවටගත් සැකකරුවන් යාපනය ප්‍රදේශයේ පදිංචි වයස අවුරුදු 30ත් 50 ත් අතර වයසේ පසුවන්නන් බවත් පොලිසිය වැඩිදුරටත් සඳහන් කළා
සැකකරුවන් අද (02) යාපනය මහෙස්ත්‍රාත් අධිකරණයට ඉදිරිපත් කිරීමට නියමිත අතර යාපනය කොට්ඨාස භාර ජ්‍යෙෂ්ඨ පොලිස් අධිකාරීවරයාගේ උපදෙස් හා අධීක්ෂණය යටතේ යාපනය අපරාධ විමර්ශන අංශයේ ස්ථානාධිපති පොලිස් පරීක්ෂකවරයා ඇතුළු කණ්ඩායමක් සිද්ධිය සම්බන්ධයෙන් වැඩිදුර විමර්ශන සිදු කරයි.
