රට තුළ විශාල වෙනසක් සහ සංවර්ධනයක් ඇති කරලීම තනි පුද්ගලයෙකුට සිදු කළ නොහැකි බවත්; එම පුද්ගලයා සහ ඒ වටා බැඳී සිටිනා වූ සියලු ම පුද්ගලයින් මෙන් ම ආයතන තුළින් ගොඩනැගිය යුතු ක්‍රියාවලියක් බවත් ජනාධිපති අනුර කුමාර දිසානායක මහතා පවසනවා.
අද (23) පෙරවරුවේ ජනාධිපතිවරයා මේ බව පැවසුවේ මහනුවර ශ්‍රී දළඳා මාලිගාව වැඳ පුදා ගැනීමෙන් අනතුරුව මල්වතු – අස්ගිරි මහ නාහිමිවරුන් බැහැ දැක ආශිර්වාද ලබා ගැනීමෙන් අනතුරුව මාධ්‍ය වෙත අදහස් පළ කරමින්.
තමන්ගේ පාර්ශ්වයෙන් ජනතාව බලාපොරොත්තු වන විශාල වෙනස ඇති කරලීමට ගත හැකි සෑම වෙනසක් ම ගැනීමට කටයුතු කරන බවයි මහ නා හිමිවරුන් බැහැ දකිමින් ජනාධිපතිවරයා ප්‍රකාශ කර සිටියේ.
එමෙන්ම ජනාධිපතිවරයා පැවසුවේ තමන්ට මහ නා හිමිවරුන් ආශිර්වාද කරමින් කියා සිටියේ ග්‍රාමීය ව සිටිමින් දුක් විඳින ජනතාවට නව ජීවිතයක් යහපත් අන්දමින් ගත කිරීමට අවශ්‍ය කටයුතු සලසා දීමට පියවර ගන්නා ලෙසයි.
රටේ එක් තැනක නොව පද්ධතියේ ම වෙනසක් ඇති කරලීමට අවශ්‍ය ව ඇති බවත් ඊට අවශ්‍ය සියලු ම කටයුතු ඉදිරියේ දී සිදු කිරීමට නියමිත බවත් නව ජනාධිපතිවරයා කියා සිටියා.
මෙහිදී මාධ්‍යවේදියෙකු විමසා සිටියේ අනුර කුමාර දිසානායක මහතා ජනාධිපති වූ පළමු දින ම සිදු කරන්නේ පාර්ලිමේන්තුව විසුරුවා හැරීම බවට කළ ප්‍රකාශය මතක දැයි යනුවෙන්.
ඊට නව ජනාධිපතිවරයා සිනහ මුසු මුහුණින් ප්‍රකාශ කළේ; ‘ලිහල බැලිය යුතු මල්ල – ඔබලා බැලීම අනවශ්‍ය’ බවත් දින දෙකක් තුළ සිදු වන්නේ කුමක්දැයි බලා සිටින ලෙසයි.
