අනුරාධපුර නව නගරය දුම්රිය ස්ථාන ආසන්නයේ දී අද (22) පස්වරුවේ දුම්රියක ගැටීමෙන් කාන්තාවන් දෙදෙනෙක් මියගොස් තිබෙනවා.
මෙම කාන්තාවන් දෙදෙනා සහ තවත් තරුණයෙක් දුම්රිය පැමිණෙන අවස්ථාවේ දී දුම්රිය මාර්ගයේ සිට සෙල්ෆි ඡායාරූපයක් ගැනීමට යාමේ දී මෙම අනතුරට මුහුණ පා ඇති බවයි වාර්තා වන්නේ.
මොවුන් තිදෙනා සිටි ස්ථානයට දුම්රිය ලංවනවාත් සමඟ තරුණයා දුම්රිය මාර්ගයෙන් ඉවතට පැන ඇති අතර, කාන්තාවන් දෙදෙනා මෙලෙස කන්කසන්තුරේ සිට කොළඹ බලා ධාවන වෙමින් තිබූ සීඝ්‍රගාමී දුම්රියේ ගැටී තිබෙනවා.
අනතුරින් මියගිය දෙදෙනා රත්නපුර ප්‍රදේශයේ පදිංචිකාරිනියන්වන අතර, අනුරාධපුර මහජන ක්‍රීඩාංගනයේ දී පැවැත්වෙන තයිකොණ්ඩු තරගාවලියක් සඳහා සහභාගී වීමට මොවුන් අනුරාධපුරයට පැමිණ ඇති බවයි වාර්තා වුණේ.
මියගිය දෙදෙනාගෙන් එක් තැනත්තියක් 37 හැවිරිදි වියේ පසු වූ අතර, අනෙක් තැනත්තිය 18 හැවිරිදි වියේ පසුවූ තරුණියක් බවයි අනාවරණය වී ඇත්තේ.
මියගිය 18 හැවිරිදි තරුණිය ඇයගේ මිතුරියකගේ මවක් සමඟ මෙලෙස ඡායාරූප ගැනීමට පැමිණි අවස්ථාවේ දී දෙදෙනා මෙම අනතුරට මුහුණ පා තිබෙනවා.
