ඩක්වත් ලුවිස් න්‍යායය සොයාගත් අවසන් පුරුකත් අභාවප්‍රාප්ත වෙයි

ජාත්‍යන්තර ක්‍රිකට් පිටියට ‘ඩක්වත් ලුවිස් න්‍යායය’ (Duckworth–Lewis–Stern method) හඳුන්වා දුන් සම නිර්මාණකරුවන් දෙපළගෙන් එක් අයෙකු වන ෆ්‍රෑන්ක් ඩක්වර්ත් අභාවප්‍රාප්ත වී තිබෙනවා.

මීට සිව් දිනකට (21) ඉහත දී ඩක්වත් මහතා අභාවප්‍රාප්ත වී ඇති බවයි espncricinfo වෙබ් අඩවිය වාර්තා කළේ.

අභාවප්‍රාප්ත වන විට ඩක්වත් මහතා 84 හැවිරිදි වියෙහි පසුවුණා.

වර්ෂ 1939 දෙසැම්බර් මස 26 වැනි දින එංගලන්තයේ ලැන්කැෂයර් හි ලිතම් ශාන්ත ඈන්ස් හි දී උපත ලබන ඩක්වත් වෘත්තියෙන් සංඛ්‍යාලේඛන විද්‍යාඥයෙක් වුණා.

ෆ්‍රෑන්ක් ඩක්වත් සමග එක් ව ටොනී ලුවිස් Tony Lewis මෙම න්‍යායය සංඛ්‍යා විද්‍යාත්මක ක්‍රමවේදය පදනම් කරගනිමින් සොයා ගත්තා.

ඩක්වත් ලුවිස් න්‍යායය නිර්මාණයට ෆ්‍රෑන්ක් ඩක්වර්ත් සමග දායක වූ ටොනී ලුවිස් 2020 වර්ෂයේ අප්‍රේල් මස 02 වැනි දින අභාවප්‍රාප්ත වූයේ 78 වියෙහි පසුවන විටදියි.

ඉන් අනතුරුව ක්‍රිකට් ක්‍රීඩාවට ඩක්වත් ලුවිස් න්‍යායය හඳුන්වා දුන් නිර්මාතෘවරුන්ගෙන් ඉතිරිව සිටි එකම පුරුක වූයේ ද ෆ්‍රෑන්ක් ඩක්වත් පමණක් වන අතර ඔහු ද දීර්ඝ කාලයක් අසනීප තත්ත්වයෙන් සිටි අතර අද දිනයේ දී මෙලෙස අභාවප්‍රාප්ත ව තිබෙනවා.

වර්ෂ 1997 දී මෙම ඩක්වත් ලුවිස් න්‍යායය පළමු වරට ජාත්‍යන්තර ක්‍රිකට් පිටියේ දී භාවිත කෙරුණා.

වර්ෂාවෙන් පීඩාවට පත් වූ ක්‍රිකට් තරගවල ප්‍රතිඵල තීරණය කිරීම සඳහා ඩක්වර්ත් ලුවිස් ස්ටර්න් ක්‍රමය මේ වනවිට ද යොදා ගැනෙනවා.

මේ සොයා ගැනීමත් සමග ඩක්වත් සහ ලුවිස් යන දෙපොළට ම 2010 ජුනි මාසයේ දී MBE (Member of the Order of the British Empire) ප්‍රදානය කිරීමටත් ජාත්‍යන්තර ක්‍රිකට් කවුන්සිලය කටයුතු කළා.

එක්දින, පන්දුවාර 20 තරගවල දී ඩක්වත් ලුවිස් න්‍යායය වැඩි වශයෙන් කණ්ඩායම්වල ජයග්‍රහණයන් මෙන් ම පරාජයන් තීරණය කිරීමට උපයෝගී වනු ඇති.