චීන ජනාධිපති ෂී ජින් පිං (Xi Jinping) මහතාගේ ආරාධනාවකට අනුව චීනයේ සිව්දින රාජ්ය සංචාරයක නිරත ජනාධිපති අනුර කුමාර දිසානායක මහතා තෙවැනි දිනය ආරම්භ කරමින් අද (16) පෙරවරුවේ රාජ්ය හා පෞද්ගලික අංශයේ ආයෝජන සැසියකට සහභාගි වීමට නියමිත ව තිබෙනවා.
ජනාධිපති මාධ්ය අංශය නිවේදනය කළේ; රාජ්ය හා පෞද්ගලික සමාගම් එක්ව සංවිධානය කරන මෙම “ආයෝජන සැසිය” ජනාධිපති අනුර කුමාර දිසානායක මහතාගේ ප්රධානත්වයෙන් පැවැත්වීම මෙහි තවත් විශේෂත්වයක් වන බවයි.
ඉන් අනතුරුව ජනාධිපතිවරයා චීන ජනතාවගේ වීරයන්ගේ ස්මාරකය වෙත පුෂ්පෝපහාර දැක්වීමට ද නියමිත ව තිබෙනවා.
ජනාධිපති අනුර කුමාර දිසානායක මහතා අද පස්වරුවේ චීන අග්රාමාත්ය ලී ච්යං හා චීන ජාතික කොංග්රසයේ සභාපති චාඕ ලජී යන මහත්වරු හමු වී සාකච්ඡා පැවැත්වීමට ද සැලසුම් කර ඇති බවත් වාර්තා වනවා.
විදේශ කටයුතු, විදේශ රැකියා සහ සංචාරක අමාත්ය විජිත හේරත්, ප්රවාහන, මහා මාර්ග, වරාය හා සිවිල් ගුවන් සේවා අමාත්ය බිමල් රත්නායක යන මහත්වරු ද මෙම අවස්ථාවන්ට සහභාගි වීමට නියමිතයි.
