ශ්‍රී ලංකා කාන්තා ක්‍රිකට් කණ්ඩායමේ නායිකා චමරි අතපත්තු මෙරට ක්‍රිකට් වංශ කතාවේ නව පිටුවක් පෙරළා තිබෙනවා.
ඒ මේ දිනවල (25) දඹුල්ලේ දී ශ්‍රී ලංකා සත්කාරකත්වයෙන් පැවැත්වෙන 2024 ආසියානු කුසලාන ක්‍රිකට් තරගාවලියේ දී කැපී පෙනෙන දක්ෂතා යළි යළිත් පෙන්වමින්.
චමරි මැලේසියාවට එරෙහිව විශිෂ්ට ශතකයක් (119*) නොදැවී ලබා ගැනීමත් සමග ශ්‍රී ලංකා ක්‍රිකට් ක්‍රීඩිකාවක් ජාත්‍යන්තර ක්‍රිකට් පිටියේ රැස් කර ඇති වැඩිම ශතක සංඛ්‍යාවට ද ඇය හිමිකම් කීමට සමත් ව වුණා.
ඇය සතුව ජාත්‍යන්තර ක්‍රිකට් පිටියේ ශතක 12ක් ලියැවී තිබෙනවා.
වර්ෂ 1998 දී පාකිස්තානයට එරෙහිව සී. සෙනෙවිරත්න ටෙස්ට් තරගයක දී නොදැවී ලකුණු 105ක් ගෙන තිබුණා.
නමුත් ඇය තබා තිබූ එම වාර්තාව බිඳ දමමින් පන්දුවාර 20 සහ එක්දින තරග රටාවෙන් වැඩිම ශතක ප්‍රමාණයක් තැබීමටයි චමරි අතපත්තුට හැකි ව ඇත්තේ.
චමරි තැබූ ශතක 12න් 09ක් ම ඇය එක්දින තරග රටාවල දී තබා තිබෙනවා.
ඒවා පිළිවෙළින් වර්ෂ 2011,2014,2017,2018,2019, 2022 සහ 2023 යන වර්ෂවල දී යි.
සෙසු ශතක ටී20 පිටියේ දී ඇය විසින් ලබාගෙන ඇති ශතක වන අතර ඒවා 2019 දී එක් ශතකයක් සහ 2024 දී ශතක දෙකක් ද ඒ අතරට අයත්.
මේ අතර, ඊයේ (24) තායිලන්තයට එරෙහිව පැවති තරගය ද ශ්‍රී ලංකා කාන්තා කණ්ඩායම කඩුලු 10කින් ජය ගැනුණා.
කාසියේ වාසිය දිනූ තායිලන්තය පළමු ව පන්දුවට පහරදීමට තීරණය කළ අතර ඔවුන් පන්දුවාර 20 අවසානයේ දී කඩුලු 07ක් දැවී රැස් කළේ ලකුණු 93ක් පමණි.
කඩුලු බිඳ දැමීමේ දී ශ්‍රී ලංකා කණ්ඩායම වෙනුවෙන් කවීෂා දිල්හාරි කඩුලු 02ක් සහ අචිනි කුලසූරිය, ඉනෝෂි ප්‍රියදර්ශනී, සුගන්ධිකා කුමාරි සහ චමරි අතපත්තු එක් ව එක් කඩුල්ල බැගින් බිඳ දැමුවා.
පිළිතුරු ඉනිම ක්‍රීඩා කළ ශ්‍රී ලංකා කාන්තා කණ්ඩායම පන්දු 51ක් තව ඉතිරිව තිබියදී කිසිවෙකු නොදැවී ලකුණු 94ක් ලබා තරගය ජයගෙන ප්‍රසාද ලකුණු සටහනේ අපරාජිත ව තවදුරටත් බී කාණ්ඩයෙන් පෙරමුණේ සිටීමට අවස්ථාව උදා කරගත්තා.
එහිදී චමරි අතපත්තු නොදැවී ලකුණු 49ක් රැස් කළ අතර; විශ්මි ගුණරත්න ද නොදැවී ලකුණු 39ක් ලබා ගත්තා.
තරගයේ වීරයා සම්මානය චමරි අතපත්තුට හිමිවුණා.
මෙම ජයග්‍රහණය සමගින් 2024 ආසියානු කුසලාන තරගාවලියේ අවසන් පූර්ව වටයට සෘජුව සහ අපරාජිව ත ශ්‍රී ලංකා කාන්තා කණ්ඩායම සුදුසුකම් ලබා ගැනීමට ද සමත් වුණා.
