ගුවන් මගියෙක්ගේ හදිසි අසනීපයක් නිසා කටුනායකට ආ ලොව දැවැන්තයා

ඩුබායි සිට ඕස්ට්‍රේලියාවේ බ්‍රිස්බේන් නුවර බලා ගුවන් ගනිමින් තිබූ එමිරේට්ස් ගුවන් සේවයේ ඊ.කේ.- 434 දරන ගුවන් යානය කටුනායක ගුවන් තොටුපොළ වෙත ඊයේ (20) රාත්‍රීයේ හදිසි ගොඩබැස්සවීමකට ලක් කර ඇති බව ගුවන් තොටුපොළ කාර්යය භාර නිලධාරීවරයා සනාථ කළා .

ලොව විශාලතම මගී ගුවන් යානාවක් වන ඒ.- 380 වර්ගයයේ මෙම ගුවන් යානය තුළ ගමන් ගත් ගුවන් මගියෙක් හදිසියේම අසනීප වූ නිසා, ඒ වනවිට ශ්‍රී ලංකා ගුවන් අවකාශය තුළ ගමන් ගනිමින් තිබූ මෙම ගුවන් යානය රාත්‍රී 07.15 ට කටුනායක ගුවන් තොටුපොළ වෙත ගොඩබැස්සවීමට එම ගුවන් යානයේ නියමුවා විසින් පියවර ගෙන තිබෙනවා .

මේ වනවිට මෙම ගුවන් මගියා ගුවන් යානයෙන් පිටතට ගෙන අවශ්‍ය වෛද්‍ය ප්‍රතිකාර ලබා දීම සදහා රෝහල් ගත කිරීමට ගුවන් තොටුපොළ බලධාරීන් පියවර ගනිමින් සිටින බවයි වාර්තා වන්නේ.

ඉන්පසු මෙම ගුවන් යානය ආපසු ඕස්ට්‍රේලියාවේ බ්‍රිස්බේන් නුවර බලා යළිත් කටුනායක ගුවන් තොටුපොළෙන් පිටත්ව යාමට නියමිතයි.