සංවිධානාත්මක අපරාධ කරුවකු වන කොස්ගොඩ තාරකගේ සමීපතමයකු බවට හඳුන්වා දෙමින් යුද හමුදා විශේෂ බළකායේ හිටපු සෙබළෙකු මෙහෙය වූ ගවයින් සොරාගැනීමේ කල්ලියක සාමාජිකයින් 3 දෙනෙකු පොලිස් අත්අඩංගුවට ගෙන තිබෙනවා.
සැකකරුවන් ගව සොරකමට යොදාගත් මෝටර් රථයක්, ත්රීරෝද රථයක්, කඩුවක්, අංක තහඩු කිහිපයක්, ගවයින් ඇල්ලීමට යොදාගත් සුදු යකඩෙන් තනන ලද උපකරණයක් ද සමග කඹයක් ද සොයාගෙන ඇති බවයි අප වාර්තාකරු සඳහන් කළේ.
සැකකරුවන් අතර දේවාලයක් පවත්වාගෙන යන කපුවෙකු ද සිටින බව සඳහන්.
හොරණ පොලිසියේ සැරයන්වරයෙකුට අයත් රුපියල් ලක්ෂ 14ක් පමණ වටිනා ගවයින් තිදෙනකු සොරාගෙන යාම සම්බන්ධයෙන් විමර්ශන සිදු කර ඊට සම්බන්ධ සැකකරුවන් අත්අඩංගුවට ගන්නා ලෙස පානදුර කොට්ඨාස භාර ජ්යෙෂ්ඨ පොලිස් අධිකාරිවරයා අඟුරුවාතොට පොලිසියට කරන ලද නියෝගයක් අනුවයි මෙම සංවිධානාත්මක කල්ලියේ සාමාජිකයන් තිදෙනා අත්අඩංගුවට ගෙන ඇත්තේ.
සැකකාර කපුවා මෝටර් රථයක් සමඟ බැල්ලපිටිය ප්රදේශයේදී අත්අඩංගුවට ගෙන සිදු කළ පරීක්ෂාවේදී එහි කාපට් එක යට සඟවා තිබී කඩුවක් සොයා ගැනුණා.
ඒ සම්බන්ධයෙන් සිදු කළ දීර්ඝ ප්රශ්න කිරීමේදී සැකකරු හෙළි කර ඇත්තේ තොවිල් කටයුතුවලට යන මුවාවෙන් අනෙකුත් සැකකරුවන් සමග රාත්රී කාලයේ දී විවිධ ප්රදේශවල සැරිසරමින් ගවයින් 40කට ආසන්න ප්රමාණයක් සොරාගත් බවටයි.
අනාවරණය වූ තොරතුරු අනුව ගව ජාවාරමට සම්බන්ධ තවත් සැකකරුවන් දෙදෙනෙකු වැලිපැන්න සහ බදුරලිය ප්රදේශවල දී ත්රීරෝද රථයක්, ව්යාජ අංක තහඩු සහ ගවයන් ඇල්ලීමට යොදා ගන්නා විශේෂිත වූ කඹයක් සමග අත්අඩංගුවට ගනු ලැබුවා.
මෙම සංවිධානාත්මක කල්ලිය මෙහෙයවන මීගහතැන්න ප්රදේශයේ පදිංචි යුද හමුදාවේ විශේෂ බලකායේ හිටපු සෙබළා ගව සොරකම සඳහා යොදාගත් ලොරියක් සමග ප්රදේශය හැර පළා ගොස් ඇතැයි පොලිසිය ප්රකාශ කළා.
සැකකරුවන් සොරාගත් සියලුම ගවයින් අලුත්ගම දර්ගා නගරයේ ව්යාපාරිකයෙකුට අලෙවි කළ බවට සැකකරුවන්ගෙන් ප්රශ්න කිරීමේ දී අනාවරණ වී තිබෙනවා.
යුද හමුදා විශේෂ බලකායේ හිටපු සෙබළා සමග මෙම කල්ලියට සම්බන්ධ තවත් කීප දෙනෙකු අත්අඩංගුවට අත්අඩංගුවට ගැනීමට නියමිතයි.
අත්අඩංගුවට ගත් සැකකරුවන් හොරණ මහේස්ත්රාත් අධිකරණය වෙත ඉදිරිපත් කිරීමට නියමිතව තිබෙනවා.
