අලෙවියේදී පාඩු ලබන භූමිතෙල් ලංකා ඉන්දියන් ඔයිල් සමාගම විසින් අලෙවි නොකරන බව බලශක්ති අමාත්ය කංචන විජේසේකර පවසනවා.
සිය නිල ට්විටර් ගිණුමට සටහනක් තබමින් ඔහු පවසන්නේ ඔවුන් අනෙකුත් ඉන්ධන වර්ග අලෙවි කරන බවයි.
ලංකා ඛනිජ තෙල් නීතිගත සංස්ථාව මඟින් ලංකා විදුලි බල මණ්ඩලය, ගමනා ගමන මණ්ඩලය, දුම්රිය දෙපාර්තමේන්තුව සහ අනෙකුත් රාජ්ය ආයතන වෙත ඉන්ධන සපයන බව සඳහන් කරන අමාත්යවරයා ඇතැම් ආයතනවලින් තෙල් සංස්ථාව වෙත මුදල් අයවිය යුතු බව ද එහි දන්වා තිබෙනවා.
තවද ඛනිජ තෙල් සංස්ථාව තුළ කාර්ය මණ්ඩල සංඛ්යාව ද විශාල බවයි ඔහු වැඩිදුරටත් පෙන්වා දී ඇත්තේ.
මේ අතර ඉන්ධන මිල ගණන් සංශෝධනය කිරීම කැබිනට් අනුමැතිය ලැබීම හේතුවෙන් සිදු වූවක් බව අමාත්යවරයා සඳහන් කරනවා.
ඉන්ධන මිල සූත්රය යළි ක්රියාත්මක කිරීමට අනුමැතිය කැබිනට් මණ්ඩලයෙන් ඊයේ (23) දින හිමිවීමත් සමඟ ඉන්ධන මිල ගණන් සංශෝධනය කළ බවයි ඔහු වැඩිදුරටත් පවසන්නේ.
