මහා පරිමාණයෙන් ගංජා ජාවාරමේ නිරත ව නීතිවිරෝධී ලෙස රුපියල් කෝටි ගණනක වත්කම් උපයා ගත් බව කියන පොත්තපිටිය පොලිස් වසමේ මැණික්දිවෙල තිරුවන ප්‍රදේශයේ පුද්ගලයෙකු සම්බන්ධයෙන් මුදල් විශුද්ධිකරණ පනත යටතේ මහනුවර පොලීසියේ කොට්ඨාස දූෂණ මර්දන ඒකකය පරීක්ෂණ ආරම්භ කර තිබෙනවා.
අප ප්‍රාදේශීය වාර්තාකරු පැවසුවේ; එම පුද්ගලයා ඉතා කෙටි කාලයක දී රුපියල් කෝටි 02කට අධික මුදලක් වැයකර නිවසක්
ඉදිකර තිබෙන බවත් ඊට අමතර ව ඔහු සතුව රුපියල් ලක්ෂ 50කට වැඩි මූල්‍ය වටිනාකමක් ඇති යතුරුපැදි 03ක් හා ත්‍රීරෝද රථයක් තිබෙන බවත් හෙළි ව ඇති බවයි.
අදාළ පුද්ගලයා යුද හමුදාවේ කොමාන්ඩෝ රෙජිමේන්තුවට අනුයුක්ත ව සේවය කර පසුව ඉන් ඉවත්ව තිබෙන බව හෙළි ව තිබෙනවා.
මේ වනවිට ගංජා ජාවාරම සම්බන්ධයෙන් රක්ෂිත බන්ධනාගාරගත කර සිටින සැකකරු මැණික්දිවෙල ප්‍රදේශයේ රුපියල් කෝටි දෙකක පමණ මුදලක් වැයකර නිවසක් ඉදිකර තිබෙන බවත්; මේ සඳහා මුදල් ලැබුණේ කෙසේ ද යන්න සම්බන්ධයෙන් තහවුරු කිරීමක් කරන්නට ඔහුට නොහැකි වී තිබෙන බවත් වැඩිදුර පරීක්ෂණවලින් අනාවරණය වී ඇති බවයි පොලිසිය පැවසුවේ.
සැකකරුගේ නිවසේ තිබී පොලිස් භාරයට ගත් එක් යතුරු පැදියක් රුපියල් ලක්ෂ 22 ක වටිනාකමින් යුක්ත බව ද තහවුරු වී තිබෙනවා.
සිද්ධිය සම්බන්ධයෙන් මහනුවර පොලිසිය වැඩිදුර පරීක්ෂණ සිදු කරනු ඇති.
