පසුගිය ජනවාරි මස පළමු වනදා හිටපු සෞඛ්‍ය අමාත්‍ය කෙහෙළිය රඹුක්වැල්ලගේ නිවස ඉදිරි පිට මල් වඩමක් තැබූ සිද්ධියේ පටිගත කර ඇති, සංස්කරණය නොකළ වීඩියෝ දර්ශන පොලිසියට ලබාදෙන ලෙස කොළඹ ප්‍රධාන මහේස්ත්‍රාත්වරයා අද (21) රූපවාහිනී මාධ්‍ය ආයතන කිහිපයකට නියෝග කළා.
කුරුඳුවත්ත පොලිසිය විසින් අධිකරණයට ඉදිරිපත් කළ කරුණු දැක්වීම සැලකිල්ලට ගනිමින් අධිකරණය විසින් මෙම නියෝගය නිකුත් කරණු ලැබුවා.
සිය සේවාදායකයාට මෙම නඩුව පවරා ඇත්තේ දේශපාලන හේතූන් මත බැවින් විමර්ශන නිලධාරීන් අධිකරණයට ඉදිරිපත් කර ඇති වීඩියෝ දර්ශන නරඹා සිය සේවාදායකයා නිදහස් කරන ලෙස සැකකාර විශේෂඥ වෛද්‍ය චමල් සංජිව වෙනුවෙන් පෙනී සිටි නීතිඥයින් අධිකරණයෙන් ඉල්ලා සිටියා.
සම්පුර්ණ වීඩියෝ දර්ශන ඇරඹීමෙන් පසුව ප්‍රමාණවත් සාක්ෂි නොමැති නම් සැකකරුව නිදහස් කරන බව පැවසූ කොළඹ ප්‍රධාන මහේස්ත්‍රාත් තිළිණ ගමගේ මහතා මෙම නඩුව ලබන පෙබරවාරි 10 වනදා යළි කැඳවීමටයි නියෝග කළේ.
