බගවන්තලාවේ සිට කාසල්රි ජලාශයට ප්රධාන වශයෙන් ජලය ගලා බසිනා කෙසෙල්ගමුඔය පතුලේ මැණික් ඉල්ලම් ගොඩ දැමීමේ ජාවාරමක් මේ දිනවල සිදු වෙමින් පවතින බව බගවන්තලාව ප්රදේශවාසීන් චෝදනා කරනවා.
අප ප්රාදේශීය වාර්තාකරු පැවසුවේ; බගවන්තලාව වතු යාය මගින් එළවළු වගා කිරීමට බදු පදනම මත ලබා දී ඇති
ඉඩමට යාබද ව කෙසෙල්ගමුඔයේ මෙම අනවසර මැණික් ගැරීමේ ජාවාරම සිදු කෙරෙන බවයි.
මේ දිනවල බගවන්තලාව පොලිස් නිලධාරින් ජනාධිපතිවරණ රාජකාරි කටයුතුවල නියැලීම හේතුවෙන් පිට පළාත්වලින් බගවන්තලාව ප්රදේශයට පැමිණ නතර වී එම ප්රදේශයේ පදිංචි මැණික් ජාවාරම්කරුවන් පිරිසක් සමග එක්ව රාත්රී
කාලයේ කිමිදුම්කරුවන් කිහිපදෙනෙකු යොදාගෙන (ජපන් ක්රමය) මැණික් ඉල්ලම් ගොඩ දැමීමේ කටයුත්තක් සිදු කෙරෙන බවට ප්රදේශවාසීන් චෝදනා කරනවා.
මේ හේතුවෙන් කෙසෙල්ගමුඔයේ ඉවුරු කඩා වැටී; විශාල පරිසර හානියකට ලක් ව ඇති බවට ද වාර්තා වනවා.
ජාවාරම්කරුවන් පිරිස කෙසෙල්ගමුඔය පතුලේ වටිනා මැණික් ඉල්ලමක් ඇති බවට හඳුනාගෙන ඇති බවත්, එම ජාවාරම්කරුවන්ට මැණික් ඉල්ලම් ගොඩ දැමීමට බගවන්තලාව පොලිසියේ ඇතැම් නිලධාරින්ගේ පුර්ණ සහයෝගය ද ලැබෙන බවයි ප්රදේශවාසින් කියා සිටින්නේ.
