කුලියාපිටිය, රත්මලේවත්ත ප‍්‍රදේශයේ නිවසක් තුළ ඊයේ (31) රාත්‍රියේ පුද්ගලයෙක් කපා කොටා ඝාතනය කර ඇති බව පොලිසිය පවසනවා.
මෙලෙස ඝාතනයට ලක්ව ඇත්තේ 31 හැවිරිදි වියේ පසු වූ අයෙක්.
මෙම පුද්ගලයා කුලියාපිටිය, ගලහිටියාව ප‍්‍රදේශයේ පදිංචිව සිටි ඉසංක දමිත් රාජපක්‍ෂ නැමැති එක්දරු පියෙක් බවයි වාර්තා වන්නේ.
මොහුට එරෙහිව කුලියාපිටිය අධිකරණයේ මිනීමැරුම් නඩුවක් ඇතුළු නඩු කිහිපයක් විභාග වෙමින් පවතින බව පොලිසිය සඳහන් කළා.
කුලියාපිටිය කාර්මික විද්‍යාල භූමියේ ඊයේ (31) පැවැති සංගීත ප‍්‍රසංගයක් නැරඹීමට යෑමට පෙර මොහු ඇතුළු තවත් කිහිපදෙනෙක් රත්මලේවත්ත ප‍්‍රදේශයේ නිවසක මත්පැන් සාදයක් පවත්වා තිබෙනවා.
එහිදී ඇති වූ බහින් බස්වීමක් දුරදිග යාමෙන් මෙම ඝාතනය සිදුකර ඇති බවයි මූලික පොලිස් පරීක්‍ෂණවල දී හෙළිවී ඇත්තේ.
පොලිසිය වැඩිදුරටත් සඳහන් කළේ ඝාතනය සඳහා අත් පොරවක් භාවිත කර තිබූ බවයි.
ඝාතනය සම්බන්ධව සැකපිට එම නිවසේ මත්පැන් සාදය අතරතුර පැමිණ ඇති බව කියන අයෙකු සහ නිවැසියන් අත්අඩංගුවට ගෙන තිබෙනවා.
මෘත ශරීරය පිළිබඳව මූලිකමහේස්ත‍්‍රිත් පරීක්‍ෂණය කුලියාපිටිය වැඩබලන මහේස්ත‍්‍රාත්වරයා විසින් සිදුකළ අතර, එහිදී නියම කෙරුණේ මෘත දේහය පශ්චාත් මරණ පරීක්‍ෂණය සදහා කුලියාපිටිය ශික්‍ෂණ රෝහල වෙත යොමු කිරීමටයි.
