මානව හිමිකම් ප්රශ්නය මුල්කරගෙන මෙවර එක්සත් ජාතීන්ගේ මානව හිමිකම් මණ්ඩලය තුළ ශ්රී ලංකාව සම්බන්ධයෙන් බරපතළ අර්බුදයක් මතුවීමේ ලකුණු පහළ කර තිබීමත් සමග ඉකුත් මහින්ද රාජපක්ෂ පාලන සමයේදී පැවැති ආකාරයට වෙනම මානව හිමිකම් අමාත්යංශයක් නිර්මාණය කිරීම කෙරෙහි ආණ්ඩුවේ අවධානය යොමුව ඇති බව දැනගන්නට තිබේ.
බොහෝ දුරට ඉදිරි දින කිහිපය තුළ මෙම අමාත්යංශය නිර්මාණය වීමේ ඉඩකඩක් පවතින අතර ඒ සමගම සුළු අමාත්ය මණ්ඩල සංශෝධනයක් සිදු කිරීම කෙරෙහි ආණ්ඩුවේ අවධානය යොමු වී ඇති බවද දැනගන්නට ඇත.
ඒ අනුව නව කැබිනට් අමාත්ය ධූර දෙකක් සහ රාජ්ය අමාත්ය ධූර 4ක් මෙම අමාත්ය මණ්ඩල සංශෝධනයේදී පත්කරනු ඇති බව වාර්තා වේ.
බොහෝ දුරට අලුතින් නිර්මාණය කරන මානව හිමිකම් අමාත්යංශය මහින්ද සමරසිංහ මහතා යටතට පත් කරනු ඇති බව ආණ්ඩුවේ අභ්යන්තර ආරංචි මාර්ග සදහන් කරයි.
ඉකුත් මහින්ද රාජපක්ෂ පාලන සමයේදී මානව හිමිකම් චෝදනා එල්ල වූ අවස්ථාවේදීත් මානව හිමිකම් අමාත්යවරයා ලෙස කටයුතු කළේ මහින්ද සමරසිංහ මහතාය.
2009 වසරේ එක්සත් ජාතීන්ගේ මානව හිමිකම් මණ්ඩලය තුළ ලංකාවට එරෙහිව පැවැති ජන්ද විමසීමේදී ඉදිරිපත් වූ යෝජනාව පරාජයට පත්කරනු ලැබූ මෙහෙයුම ක්රියාත්මක වූයේද මහින්ද සමරසිංහ මහතාගේ ප්රධානත්වයෙනි.
මීට අමතරව නැගෙනහිර පළාතට ආණ්ඩුවේ ආමාත්යවරයකු නොමැති වීම හේතුකොටගෙන ඒ.එල්.එම්. අතාවුල්ලා මහතාටද කැබිනට් අමාත්ය ධුරයක් ලබා දීම කෙරෙහි ආණ්ඩුවේ අවධානය යොමුව ඇති බව දැනගන්නට ඇත.
ඉදිරි කාලයේදී පළාත් සභා මැතිවරණය පැවැත්වීමේ සූදානමක්ද පවතින බැවින් නැගෙනහිර පළාත ඉලක්ක කර මෙම පත්කිරීම සිදු වනු ඇති බවද වාර්තා වේ.
