කලාවැව ආශ්රිත ජල පෝෂක ප්රදේශවලට ඇද හැලෙන අධික වර්ෂාවත් සමඟ අද (19) සවස කලාවැවේ හදිසි වාන් දොරටු දෙක අඩි 06 බැඟින් විවෘත කිරීමට කලාවැව ජලාශය භාර කාර්යාලය කටයුතු කර තිබෙනවා.
එම කාර්යාලය සඳහන් කරන්නේ මේ වනවිට කලාවැවේ සමස්ථ ජලධාරිතාවය අක්කර අඩි 86,916ක්ව පවතින බවයි.
ඒ, අනුව මේ වනවිට කලාවැව පිටාරගැලීම ද සිදුවෙමින් පවතින අතර, මෙලෙස හදිසි වාන් දොරටු විවෘත කිරීමත් සමඟ කලා ඔයට මුදාහැරෙන ජලප්රමාණය තප්පරයට ඝන අඩි 6300ක් පමණ වන බවයි බෝවතැන්න හා කලාවැව භාර කාර්යභාර ඉංජිනේරු බුද්ධික මහේෂ් නවරත්න සඳහන් කළේ.
ඉංජිනේරුවරයා වැඩිදුරටත් සඳහන් කළේ අද (19) රාත්රිය වනවිට තවදුරටත් වාන්දොරටු විවෘත කිරීමට සිදුවිය හැකි බවයි.
කලාවැව හදිසි වාන් දොරටු විවෘත කිරීමත් සමඟ මේ වනවිට කලාවැව – අවුකන මාර්ගය අවුකන විහාරස්ථානය ආසන්නයෙන් ජලයෙන් යටවී ඇති අතර එම මාර්ගයේ ගමනාගමන කටයුතු ද මේ වනවිට ඇනහිට තිබෙනවා.
මේ හේතුවෙන් විකල්ප මාර්ග භාවිත කරන ලෙසට පොලිසිය එම මාර්ගය භාවිත කරන ජනතාවගෙන් ඉල්ලා සිටිනවා.
