ශ්රී ලංකාවේ ඊජිප්තු අරාබි ජනරජයේ තානාපති අතිගරු Adel Ibrahim මහතා අද (27) දින ශ්රී ජයවර්ධනපුර කෝට්ටේ පිහිටි ආරක්ෂක අමාත්යාංශයේ දී ආරක්ෂක ලේකම් (විශ්රාමික) එයාර් වයිස් මාර්ෂල් සම්පත් තුයියකොන්තා හමු වුණා.
ආරක්ෂක අමාත්යාංශය නිකුත් කළ නිවේදනයේ දැක්වෙන්නේ, ඊජිප්තු තානාපතිවරයා ආරක්ෂක අමාත්යාංශයට පැමිණි අවස්ථාවේදී ආරක්ෂක ලේකම්වරයා විසින් ඔහුව ඉතා උණුසුම් අයුරින් පිළිගත් අතර, ඔවුන් දෙරට අතර ද්විපාර්ශ්වික සබඳතා ශක්තිමත් කිරීම කේන්ද්ර කරගත් සුහද සාකච්ඡාවක නිරත වූ බවයි.
ආරක්ෂක සේවා අණ සහ මාණ්ඩලික විද්යාලය හරහා අධ්යයන හා වෘත්තීමය දැනුම හුවමාරු කර ගැනීම කෙරෙහි විශේෂ අවධානයක් යොමු කරමින්, ආරක්ෂක සහයෝගීතාව වැඩි දියුණු කිරීම සඳහා මෙම සාකච්ඡාවේ විශේෂ අවධානය යොමු වුණා.
ආරක්ෂක ක්ෂ්ත්රයේ අධ්යයන කටයුතු, ධාරිතා වර්ධනය සහ ජාත්යන්තර හමුදා පුහුණු වැඩසටහන් යන ක්ෂ්ත්රවල අන්යෝන්ය සහයෝගීතාවය සඳහා ඇති අවස්ථා පිළිබඳව දෙපාර්ශ්වයම සාකච්ඡා කළා.
දෙරට අතර, ගැඹුරු අවබෝධයක් සහ සහයෝගීතාවයක් වර්ධනය කිරීම සඳහා අවස්ථාවක් ලෙස ආරක්ෂක සේවා අණ සහ මාණ්ඩලික විද්යාලයෙහි ජාත්යන්තර සහයෝගීතා අධ්යයනයේ වැදගත්කම ද, ඔවුන්ගේ අවධානයට ලක් වුණා.
දෙරට අතර ආරක්ෂක සබඳතා තරකිරීම සඳහා ඊජිප්තු රාජ්යයේ කැපවීම සබැඳි කරුණු තානාපති Ibrahim මහතා ප්රකාශ කළ අතර, ඊජිප්තු රාජ්යය සමඟ පවතින දිගුකාලින මිත්රත්වය සහ සහයෝගීතාවය ආරක්ෂක ලේකම්වරයා මෙම අවස්ථාවේ සිහිපත් කරමින් එම පවතින සබදතා තවදුරටත් ශක්තිමත් කිරීම සඳහා ශ්රී ලංකාවේ කැපවීම අවධාරණය කළා.
ආරක්ෂක ක්ෂ්ත්රයේ සහයෝගීතාව වර්ධනය සඳහා තවදුරටත් මාර්ග ගවේෂණය කිරීමට දෙපාර්ශ්වයේම කැමැත්ත පළ කරමින් මෙම හමුව අවසන් වුණා.
ආරක්ෂක අමාත්යාංශයේ නියෝජ්ය හමුදා සම්බන්ධතා නිලධාරී ද, මෙම අවස්ථාවට සහභාගී වූ බවයි වාර්තා වන්නේ.
