ඉලංගෙයි තමිල් අරසු පක්ෂයේ මහලේකම්වරයා තෝරා ගැනීම වෙනුවෙන් පැවති රැස්වීමක උණුසුම් තත්ත්වයක් ඇතිවී තිබෙනවා.
ත්‍රිකුණාමල ප්‍රදේශයේ පැවති එම අවස්ථාවේ ඇතිවූ කලහකාරී තත්ත්වය හේතුවෙන් අද පැවැත්වීමට නියමිතව තිබූ පක්ෂයේ මහ සමුළුව ද අවලංගු කර ඇති බවයි අප වාර්තාකරුවන් සඳහන් කළේ.
පක්ෂයේ 17 වැනි ජාතික සමුළුව වෙනුවෙන් මධ්‍යම කාරක සභාව ඊයේ (27) රැස්වී අදහස් දක්වා එම පක්ෂයේ නව විධායක කමිටුව තෝරා පත් කර ගෙන තිබෙනවා.
තෝරාගත් අයගේ නම් පසුව ඉදිරිපත් කර ඇති අතර එම අවස්ථාවේදී පක්ෂයේ නව කළමනාකාරීත්වය තේරීම සම්බන්ධයෙන් මධ්‍යම කාරක සභාව ගත් තීරණය පිළිගත නොහැකි බවයි පිරිසක් ප්‍රකාශ කර ඇත්තේ.
ඉලංගෙයි තමිල් අරසු පක්ෂයේ නව නායකයා ලෙස පාර්ලිමේන්තු මන්ත්‍රී සිවඥානම් ශ්‍රීදරන් මහතා පසුගිය 21 වනදා තේරී පත් වුණා. ඉන් අනතුරුව අනෙකුත් තනතුරු සඳහා සාමාජිකයන් තෝරා ගැනීම සඳහායි ඊයේ ත්‍රිකුණාමලයේ හෝටලයකදී රැස්වීම පවත්වා ඇත්තේ.
මධ්‍යම කාරක සභාවේ උපදේශක කාරක සභාවට ෂන්මුගම් කුකදාසන්, ජ්‍යෙෂ්ඨ උප සභාපති ලෙස උතුරු පළාත් සභා සභාපති සී.වී.කේ.ශිවඥානම්, මඩකලපු දිස්ත්‍රික් හිටපු පාර්ලිමේන්තු මන්ත්‍රී එන්.ජී.සිරිනේසන් සහ කනකසබාපති තෝරාගෙන තිබෙනවා.
උප සභාපතිවරුන් ලෙස, ජනාධිපති නීතීඥ කේ.වී.තවරාසා, පාර්ලිමේන්තු මන්ත්‍රීවරුන් වන චාල්ස් නිර්මලනාදන්, කලියරසන්, හිටපු පාර්ලිමේන්තු මන්ත්‍රී පී.ආරියනේන්ද්‍රන්, උතුරු පළාත් හිටපු සෞඛ්‍ය අමාත්‍ය පී.සත්‍යලිංගම්, සම ලේකම්වරුන් වන හිටපු පාර්ලිමේන්තු මන්ත්‍රී ශාන්ති සිරිස්කන්දරාජා, රංජනී කනකරාජා, මඩකලපුව හිටපු ප්‍රධාන අමාත්‍ය සරවනභවන්. පාර්ලිමේන්තු මන්ත්‍රී සී සිවමෝහන් ලෙස පාර්ලිමේන්තු මන්ත්‍රී අයි.සනාකියන්, හිටපු මන්ත්‍රීවරුන් 13 දෙනෙකු තේරී පත්කර ගැනුණා.
අනතුරුව මහා සභාව විසින් කැඳවන ලද මධ්‍යම කාරක සභාව විසින් ගනු ලැබූ යෝජනා මහා සභාවට ඉදිරිපත් කරනු ලැබුවා.
විධායක කමිටුවේ මෙම තීරණය පිළිගැනීම ප්‍රතික්ෂේප කර ඇති ඇතැම් මන්ත්‍රීවරුන් මහ සභාවේදී ජනමත විචාරණයක් පවත්වා එම තනතුරු සඳහා ඡන්දයක් පැවැත්විය යුතු බවටයි අවධාරණය කර ඇත්තේ.
මේ හේතුවන් විකල්ප සම්බන්ධයෙන් පවතින සාකච්ඡා හමුවේ අද පැවැත්වීමට නියමිතව තිබූ පක්‍ෂ සම්මේලනය කල් දමා ඇති අතර හෙට පාක්ෂ බලධාරීන් රැස්වී සාකච්ඡා කර නිවේදනයක් නිකුත් කිරීමට නියමිතයි.
