ඇමරිකාවේ නිව් හැම්ප්ෂයර් ප්රදේශයේ මනෝචිකිත්සක රෝහලක ආලින්දයේ සිදුවූ වෙඩි තැබීමකින් පුද්ගලයෙකු මියගොස් තිබෙනවා.
රෝහලට අනුයුක්ත ආරක්ෂක අංශ නිලධාරියෙකු සිදු කළ ප්රති ප්රහාරවලින් වෙඩි තැබීම සිදු කළ පුද්ගලයා ද මරණයට පත්වී ඇති බවයි විදෙස් මාධ්ය වාර්තා කළේ.
වෙඩි ප්රහාරය එල්ල කළ පුද්ගලයා, ඝාතනයට ලක්වූ පුද්ගලයා හෝ වෙඩි තැබීමේ අරමුණක් පිළිබඳව පොලිසිය මෙතෙක් අනාවරණ කරගෙන නැහැ.
සිකුරාදා සවස මාධ්යවේදීන් අමතමින් පොලිස් මාධ්ය ප්රකාශක කර්නල් මාර්ක් හෝල් පැවසුවේ සැකකරු රෝහලේ ආලින්දයට ඇතුළු වී පුද්ගලයෙකුට වෙඩි තබා ඇති බවයි.
අනතුරුව ආරක්ෂක නිලධාරියෙකු සැකකරුට වෙඩි තබා ඇති බවයි පොලිසිය සඳහන් කර ඇත්තේ.
මියගිය වින්දිතයා හඳුනාගෙන නොමැති අතර, වෙඩි තැබූ පුද්ගලයාගේ අනන්යතාවය සොයා නිලධාරීන් පරීක්ෂණ සිදු කරමින් සිටින බව ද ඔහු ප්රකාශ කළා.
ප්රදේශයේ ඇති සැකකටයුතු වාහනයක් මේ වන විට ප්රාන්ත පොලිස් කණ්ඩායමක් විසින් විමර්ශනය කරමින් පවතින අතර මහජනතාවට කිසිදු තර්ජනයක් නොමැති බව අවධාරණය කර තිබෙනවා.
නිව් හැම්ප්ෂයර් සෞඛ්ය හා මානව සේවා කොමසාරිස් ලෝරි වීවර් අදහස් දක්වමින් කියා සිටියේ රෝහලේ සියලුම රෝගීන් සහ කාර්ය මණ්ඩලය ආරක්ෂිත බවත් එහි මෙහෙයුම් සාමාන්ය පරිදි සිදුවන බවයි.
වෙඩි තැබීම සිදු වූ මනෝචිකිත්සක රෝහලේ ඇඳන් 185ක් පමණ ඇති අතර එම රෝහල, ප්රාන්තයේ ප්රමුඛතම මනෝචිකිත්සක රෝහල ලෙසටයි සැලකෙන්නේ.
