ආසියාවේ ක්‍රිකට් ශූරියන් තෝරන අවසන් මහා සටන අද

ආසියානු කුසලාන කාන්තා ක්‍රිකට් තරගාවලියේ අවසන් මහා තරගට අද (28) පැවැත් වෙනවා.

මෙවර තරගාවලියේ අවසන් මහා තරගය සඳහා ශ්‍රී ලංකා කාන්තා කණ්ඩයම සහ ඉන්දීය කාන්තා කණ්ඩායම සුදුසුකම් ලබා තිබෙනවා.

මෙම කණ්ඩායම් දෙකම තරගාවලියේ අපරාජිත කණ්ඩායම් දෙකක් ලෙස මෙවර අවසන් මහා තරගය සඳහා සුදුසුකම් ලබා තිබීම ද විශේෂත්වයක්.

මෙවර ආසියානු කුසලානයේ ලකුණු සංඛ්‍යාව අනුව ඉන්දියාව සහ ශ්‍රී ලංකාව පිළිවෙලින් ලකුණු 559ක් සහ 504ක් ලබාගෙන ඇති අතර, ඉන්දියාව වෙනුවෙන් ක්‍රීඩිකාවන් හතරදෙනෙක් මෙවර තරගාවලියේ දී අර්ධ ශතක 04ක් වාර්තා කර තිබෙනවා.

ශ්‍රී ලංකාව වෙනුවෙන් චමරි අතපත්තු සහ විශ්මි ගුණරත්න මෙවර ආසියානු කුසලානයේ දී අර්ධ ශතක රැස්කළ ක්‍රීඩිකාවන් වනවා.

පන්දුවෙන් ඉන්දියාව සහ ශ්‍රී ලංකාව පිළිවෙළින් කඩුලු 31ක් සහ 27ක් දවාගෙන දෙපිළම ඉතා තරගකාරී තත්ත්වයක පසුවනවා.

කාන්තා ආසියානු කුසලාන තරගාවලි 08ක් මෙතෙක් පවත්වා ඇති අතර, ඉන් එක් අවස්ථාවක හැර අවස්ථා 07ක දී ශූරියන් බවට පත්වීමට ඉන්දීය කණ්ඩායමට හැකියාව ලැබී තිබෙනවා.

ඒ, අනුව ඉන්දියාව සිය 08 වන ආසියානු කුසලානයේ ජනග්‍රහණය වෙනුවෙන් පිටියට පිවිසෙන අතර, සිය කුළුඳුල් ආසියානු කුසලානය දෝතට ගැනීමේ අරමුණින් ශ්‍රී ලංකා කාන්තා කණ්ඩායම අද පිටියට පිවිසෙනවා.

මෙවර කාන්තා ආසියානු කුසලාන විස්සයි විස්ස තරගාවලියේ ශූරියන් තෝරාගනු ලබන අවසන් මහා තරගය රංගිරි දඹුලු ජාත්‍යන්තර ක්‍රිකට් ක්‍රීඩාංගණයේ දී අද (28) පස්වරු තුනට ආරම්භ වීමට නියමිතයි.