එංගලන්තය සහ ඕස්ට්රේලියාව අතර පැවැත්වෙන 2025-2026 අළු බඳුන තරගාවලියේ සිය පළමු ජය වාර්තා කරමින්, තරගාවලියේ සිව්වන තරගය ජය ගැනීමට එංගලන්තය අද (27) සමත් වුණා.
තරගය බොක්සිං ඩේ තරගයක් ලෙස නත්තලට පසුදින ඕස්ට්රේලියාවේ මෙල්බන් පිටියේදී ආරම්භ වූ අතර මෙතෙක් ඉතිහාසයේ වැඩිම ප්රේක්ෂක පිරිසක් නැරඹීමට පැමිණි ක්රිකට් තරගය ලෙස මෙම තරගය වාර්තා පොත් අතරට එක්වුණේ තරගය නැරඹීම සඳහා ප්රේක්ෂකයින් 94,199ක් MCG පිටියට පැමිණීමත් සමඟයි.
තරගයේ කාසියේ වාසිය ජයග්රහණය කළ එංගලන්තය පළමුවෙන් පන්දු යැවීම තෝරා ගනු ලැබුවා.
ඒ අනුව සිය පළමු ඉනිම සඳහා පිටියට පිවිසි ඕස්ට්රේලියානු පිතිකරුවන් සිය පළමු ඉනිම වෙනුවෙන් සියල්ලන් දැවී ගොස් රැස්කර ගනු ලැබුවේ ලකුණු 152ක් පමණයි.
එහිදී විශිෂ්ඨ පන්දු යැවීමක නිරත වූ එංගලන්තයේ වේග පන්දු යවන ක්රීඩක ජෝෂ් ටන් ලකුණු 45කට කඩුලු 05ක් දවා ගත්තා.
කෙසේ වෙතත් ඉන් අනතුරුව සිය පළමු ඉනිම සඳහා පිටියට පිවිසි එංගලන්තයට ද රැස් කර ගැනීමට හැකිවූයේ ලකණු 110ක් පමණයි.
ඒ අනුව ලකුණු 42ක පළමු ඉනිමේ වාසියක් ද අත්කර ගනිමින් දෙවන ඉනිම වෙනුවන් පිටියට පිවිසි ඕස්ට්රේලියාවට එම ඉනිමේදී සාර්ථක විමට ඉඩ නොදුන් එංගලන්තය ඔවුන් සියල්ලන් දෙවනි ඉනිමෙදි ද ලකුණු 132කට දවා ගනු ලැබුවා.
තරගය ජය ගැනීම සඳහා ලකුණු 175ක ඉලක්කයක් සමඟ පිටියට පිවිසි එංගලන්තය කඩුලු 06ක් පමණක් දැවීගොස් එම ඉලක්කය සාර්ථකව ජය ගනු ලැබුවා.
කෙසේ වෙතත් මෙම තරගය එංගලන්තය ජයග්රහණය කළ ද තරගාවලියේ පලමු තරග තුනම ජයගත් ඔස්ට්රේලියාව කල්වේලා ඇතුවම තරගාවලිය ජයගෙන අවසන්.
එමෙන්ම තරගාවලියේ පළමු තරගය ලෙස පර්ත් හිදී පැවති තරගයේ මෙන්ම අද මෙල්බන් පිටියේ නිමා වූ මෙම තරගයේ ද තණතීරු සම්බන්ධයෙන් ක්රිකට් විස්තර විචාරකයින් මේ වන විට දැඩි කණස්සල්ල පළ කරමින් ප්රකාශ නිකුත් කර තිබෙනවා.
