අලුත විවාහ වූ යුවළක පුරුෂයා විසින් සිය බිරිඳව ගෙළ සිරකර ඝාතනය කර එම පුද්ගලයා ද සියදිවි නසාගත් පුවතක් ඉන්දීය මාධ්‍ය වාර්තා කරනවා.
ඔවුන්ගේ විවාහ උත්සවයෙන් පැය කිහිපයකට පසු මෙම සිදුවීම සිදුව ඇති බවයි ඉන්දීය මාධ්‍ය වැඩිදුරටත් තොරතුරු වාර්තා කළේ.
ප්‍රදීප් සහ ශිවානි නැමැති මෙම යුවළ පසුගිය සෙනසුරාදා විවාහ දිවියට පිවිස ඇති අතර, මනාලිය සහ මනාලයා සෙනසුරාදා (08) රාත්‍රියේ ඔවුන්ගේ කාමරය වෙත ගොස් තිබෙනවා.
පසුදින උදෑසන යුවළ සිටි කාමරයට කතා කළත් කාමරය තුළින් කිසිඳු ප්‍රතිචාරයන් නොමැතිවීම හේතුවෙන් පවුලේ සාමාජිකයින් කාමරයේ දොර කඩා බලා තිබෙනවා.
එහිදී ශිවානිගේ සිරුර ඇඳ මත තිබී සොයාගෙන ඇති අතර, ප්‍රදීප්ගේ සිරුර සිවිලිමේ විදුලි පංකාවේ එල්ලී තිබිය දී සොයාගෙන ඇති බවයි වාර්තා වන්නේ.
අයෝධ්‍යා හි කැන්ට් පොලිස් ස්ථාන සඳහන් කළේ කාමරය ඇතුළතින් අගුළු දමා තිබූ බැවින්, මනාලයා මනාලිය මරා දමා ඔහුගේ ජීවිතය නැති කරගෙන ඇති බවට සැකපළ කළ හැකි බවයි.
