අලුත් අවුරුද්දේ එළවළුත් කන්න බැරිවෙන ලකුණු (වීඩියෝ)

මේ දිනවල එළවළු මිල අහස උසට ගොස් ඇති පසුබිමක ඇතැම් ප්‍රදේශවල අමු මිරිස් කිලෝවක සිල්ලර මිල රුපියල් 1800ක් දක්වා වැඩි වී තිබෙනවා.

තොග වෙළඳුන් පෙන්වා දෙන්නේ බොහෝ එළවලු ග්‍රෑම් 250ක මිල රුපියල් තුන්සීයේ සීමාවට ළඟා වී ඇති බවයි.

දිවයිනේ බොහෝ ප්‍රදේශවලට පසුගිය කාලසීමාව පුරා නොකඩවා ඇඳ හැළුනු වර්ෂාවත් සමග ඇති වු අයහපත් කාලගුණික තත්ත්වය හේතුවෙන් එළවලු වගාවන්ට දැඩි හානි සිදුව තිබුනා.

මේ හේතුවෙන් බොහෝ ආර්ථික මධ්‍යස්ථානවලට සැලකිය යුතු තරම් එළවලු තොග නොලැබීම හේතුවෙන් මෙලෙස එළවලු මිල අධික ලෙස ඉහළ ගොස් ඇති බවයි තොග වෙළඳුන් පෙන්වා දෙන්නේ.

වෙළඳුන් පවසන්නේ වර්තමානයේ පවතින එළවලු හිඟය ලබන වසරේ අප්‍රේල් උත්සව සමය දක්වාම පැවතිය හැකි බවයි.

වෙනත් දිනවලට සාපේක්ෂව මේ දිනවල පෑලියගොඩ මැණිං වෙළඳපලට හා ආර්ථික මධ්‍යස්ථානවලට දෛනිකව ලැබිය යුතු එළවළු තොගවලින් 25% ක ප්‍රමාණයක්වත් නොලැබෙන බව තොග වෙළදුන් පවසනවා.

මේ අතර, අධික ලෙස අමු මිරිස් මිල ඉහළ ගොස් ඇති අතර බොහෝ ආර්ථික මධ්‍යස්ථානවල අමු මිරිස් කිලෝවක තොග මිල රුපියල් 1200ක පමණ මට්ටමකට ඉහළ ගොස් තිබුනා.

වෙළඳුන් පෙන්වා දෙන්නේ වටිනා බඩු භාණ්ඩ රැකගන්නා ආකාරයෙන් වෙළඳපළ වෙත ගෙන එන අමු මිරිස් ගෝනි ආරක්ෂා කිරීමට සිදුව ඇති බවයි.

මේ අතර සිල්ලර වෙළඳුන් පැවසුවේ තමන්ට අමු මිරිස් කිලෝවක් අලෙවි කිරීමට සිදුව ඇත්තේ රුපියල් 1800ක පමණ මිලකට බවයි.

ඒ් අනුව අමු මිරිස් කරලක මිල ආසන්න වශයෙන් රුපියල් 15ක් පමණ වනවා.