අන්තර්ජාලය ඔස්සේ රැවටී ලිංගික අපයෝජනයන්ට ලක්වූ ළමුන් හා කාන්තාවන් ගණන ඉහළට

2025 වසරේ මේ දක්වා කාලය තුළ අන්තර්ජාලය ඔස්සේ ළමුන් 28 දෙනෙකු ලිංගික අපයෝජනයට ලක්ව ඇති බව පොලිසිය පවසනවා.

ඊට අමතරව කාන්තාවන් 118 දෙනෙකු ද වසරේ මේ දක්වා කාලය තුළ අන්තර්ජාලය ඔස්සේ ලිංගික අපයෝජනයට ලක්ව ඇති බවයි පොලිස් මාධ්‍ය ප්‍රකාශක සහකාර පොලිස් අධිකාරී එෆ්. යූ. වුට්ලර් සඳහන් කළේ.

මේ අතර 2024 වර්ෂය තුල දී මෙලෙස අන්තර්ජාලය ඔස්සේ ලිංගික අපයෝජනයට ලක්ව ඇති ළමුන් ගණන 15ක් වන අතර, කාන්තාවන් සංඛ්‍යාව 375ක් බවයි මාධ්‍ය ප්‍රකාශකවරයා පැවසුවේ.

මෙම අන්තර්ජාලය ඔස්සේ සිදුකරන ලිංගික අපයෝජනයන සම්බන්ධයෙන් සැකකරුවන් 114 දෙනෙකු පසුගිය 2024 වසර තුළ දී අත්අඩංගුවට ගෙන තිබෙනවා.

මේ අතර 2024 වසර තුළ දී මත්ද්‍රව්‍ය වැරදි සම්බන්ධයෙන් ළමුන් 282ක් අත්අඩංගුවට ගෙන ඇති බව සදහන් කළ පොලිස් මාධ්‍ය ප්‍රකාශකවරයා මෙම වසරේ මේ දක්වා කාලය තුළ මත්ද්‍රව්‍ය වැරදිවලට ළමුන් 206 දෙනෙකු අත්අඩංගුවට ගෙන ඇති බව පැවසුවා.