ඉන්දියාවේ පැවති පාලි හා සංස්කෘත අන්තර්ජාතික භික්ෂු හුවමාරු වැඩසටහනට, ශ්‍රී ලංකා බෞද්ධ සහෝදරත්ව පදනම නියෝජනය කරමින් සහභාගී වූ ත්‍රෛනිකායික භික්ෂූන් වහන්සේලා එකොළොස් දෙනෙකු ඊයේ (21) රාත්‍රියේ දී කටුනායක ගුවන් තොටුපොළ වෙත පැමිණියා.
ඔවුන් පුරා මාසයකට අධික කාලයක් ඉන්දියාවේ බුද්ධගයා, නාලන්දා විශ්වවිද්‍යාලය, කර්නාටක ප්‍රාන්තයේ බැංගලෝරයේ පැරණි විහාරස්ථානවල අධ්‍යයන චාරිකාවල නිරත වෙමින් ථේරවාදී සහ මහායාන බෞද්ධ සම්ප්‍රදායන් අතර පවතින සම – විෂමතා හඳුනා ගැනීම සඳහා විනය, සූත්‍ර, අභිධර්ම සහ මධ්‍යම ප්‍රතිපදාව යන තේමා ඔස්සේ සිය අධ්‍යයන කටයුතුවල ද නිරත වූ බවයි ගුවන්තොටුපොළ වාර්තාකරු පැවසුවේ.
මෙම වැඩසටහන අතරතුර ඉන්දියාවේ කර්නාටක ප්‍රාන්තයේ බැංගලෝර් නුවර බෞද්ධ විහාරස්ථානයක් වෙත වැඩම කර සිටි දළයිළාමා තුමා දැක බලා ගැනීමේ අවස්ථාව ද මෙම භික්ෂූන් වහන්සේලා පිරිසට උදා වී තිබුණා.
මෙකී වැඩසටහනට ශ්‍රී ලංකාව, ඉන්දියාව, ටිබෙටය, තායිලන්තය, දකුණු කොරියාව, වියට්නාමය, භූතානය යන රටවලින් ද භික්ෂුන් වහන්සේලා 50 දෙනෙකු පමණ වැඩම කර සිටියා.
