අනීතිකව අත්අඩංගුවට ගෙන වද හිංසා සිදුකළ බව කියන සිද්ධිය සම්බන්ධයෙන් ජනප්‍රිය ලේඛක කසුන් මහේන්ද්‍ර හීනටිගල අතුරුගිරිය පොලිසියේ ස්ථානාධිපතිවරයාට එරෙහිව පැමිණිල්ලක් ගොනුකර තිබෙනවා.
කසුන් මහේන්ද්‍ර සහ ඔහුගේ බිරිඳ වන ජනප්‍රිය නිළි මාධවී ඇන්තනී අද (21) පස්වරුවේ පොලිස්පති සහන මැදිරියට වෙත මෙම පැමිණිල්ල සිදුකරනු ලැබුවා.
ඊයේ (20) පස්වරුවේ අතුරුගිරිය, හබරකඩ ප්‍රදේශයේ නිවස අසල පිහිටි වෙළඳසැලකට ගිය අවස්ථාවේ දී සිය අනන්‍යතාව තහවුරු කිරීමට ජාතික හඳුනුම්පත නොතිබීම හේතුවෙන් තමන්ව පොලිස් නිලධරීන් විසින් අතුරුගිරිය පොලිස් ස්ථානය වෙත රැගෙන ගිය බවයි කසුන් මහේන්ද්‍ර පවසන්නේ.
එලෙස රැගෙන ගිය තමන්ට පොලිස් ස්ථානය තුළ දී පහර දුන් බවත් ස්ථානාධිපතිවරයා ඇතුළු නිලධාරීන් කිහිපදෙනෙක් තමන්ට අපහසත්මකව බැණ වැදුණු බවත්, පැමිණිල්ල සිදුකිරීමෙන් අනතුරුව මාධ්‍ය වෙත අදහස් දක්වමින් සඳහන් කළා.
එමෙන්ම තමන්ගේ අනන්‍යතාව තහවුරු කිරීම සඳහා තමන්ගේ ජාතික හැඳුනුම්පත සහ විදෙස් ගමන් බලපත්‍රය ද රැගෙන අතුරුගිරිය පොලිස් ස්ථානය වෙත පැමිණි බිරිඳට සහ සහෝදරියට අනවශ්‍ය ආකාරයේ ප්‍රකාශ කරමින් ස්ථානාධිපතිවරයා බැණ වැදුණු බවත් ඔහු මෙහිදී වැඩිදුරටත් පැවසුවා.
