හඟුරන්කෙත ප්‍රදේශයේදී තරුණයෙකුට පොලුවලින් පහරදී ඝාතනය කිරීමේ සිද්ධියට සම්බන්ධ කාන්තාවක් සහ සැකකරුවන් 7 දෙනෙකු මහනුවර කොට්ඨාස අපරාධ විමර්ශන කාර්යාංශය වෙත භාරවී තිබෙනවා.
ඊයේ (27) භාර වූ ඔවුන් අත්අඩංගුවට ගෙන රක්ෂිත බන්ධනාගාර ගත කර ඇති බවයි පොලිසිය සඳහන් කළේ.
පසුගිය 20 වනදා හඟුරන්කෙත ප්‍රදේශයේදී පොලුවලින් පහරදී මෙම තරුණයා ඝාතනය සහ තවත් පිරිසකට තුවාල කිරීමෙි සිදුවීමක් සම්බන්ධයෙන් හඟුරන්කෙත පොලිසිය විමර්ශන ආරම්භ කර තිබුණා.
මෙම සිද්ධියට අදාළව පසුගිය 22 වනදා එක් සැකකාරියක් අත්අඩංගුවට ගෙන වලපනේ මහේස්ත්‍රාත් අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගතකර තිබුණා.
අනෙක් සැකකරුවන් අත්අඩංගුවට නොගැනීමට විරෝධය පළ කරමින් පෙරේදා රාත්‍රී හඟුරන්කෙත පොලිසිය අසල ප්‍රදේශවාසීන් විරෝධතාවක නිරත වූ අතර එහිදී පොලිසිය අහසට වෙඩි ප්‍රහාර 38ක් ද එල්ල කරනු ලැබුවා.
ඒ විරෝධතාව පාලනය කිරීම සඳහායි.
එම විරෝධතාවත් සමග තරුණයාගේ ඝාතනයට අදාළව කාන්තාවක් ඇතුළු 8 දෙනෙකු ඊයේ පොලිසියට භාරවීමෙන් අනතුරුව අත්අඩංගුවට ගනු ලැබුවා.
සැකකාරිය හඟුරන්කෙත ප්‍රදේශයේ පදිංචි 48 හැවිරිදි අයෙක් වන අතර සැකකරුවන් අවුරුදු 19 සහ 63 වයස්වල පසුවනවා.
ඔවුන් හඟුරන්කෙත, රිකිල්ලගස්කඩ සහ මතුරට ප්‍රදේශවල පදිංචිකරුවන්.
මෙම පිරිස ඊයේ වලපනේ මහේස්ත්‍රාත් අධිකරණයට ඉදිරිපත් කිරීමෙන් පසු ලබන ජුලි මස 6 වනදා දක්වා රක්ෂිත බන්ධනාගාර ගතකර තිබෙනවා.
මෙම ඝාතන සිද්ධිය සම්බන්ධයෙන් හඟුරන්කෙත පොලිසිය පරීක්ෂණ සිදු කරනවා.
