වෙනිසියුලාවේ වැඩබලන ජනාධිපතිනි ඩෙල්සි රොඩ්රිගස් (Delcy Rodriguez) පස් දින නිල සංචාරයක් සඳහා අද (03) ඉන්දියාවට පැමිණීමට නියමිතයි.
ජුනි මස 3 වනදා සිට 7 වනදා දක්වා පැවැත්වෙන මෙම සංචාරයේදී ඇය ඉන්දීය අග්රාමාත්ය නරේන්ද්ර මෝදි සමඟ ද්විපාර්ශ්වික සාකච්ඡා පවත්වනු ඇති බවයි ඉන්දීය විදේශ අමාත්යාංශය ප්රකාශ කරන්නේ.
මැදපෙරදිග පවතින යුදමය වාතාවරණය හේතුවෙන් හෝමුස් සමුද්ර සන්ධිය (Strait of Hormuz) වැසී යාම නිසා, ඉන්දියාවට අවශ්ය බොරතෙල් සැපයුමට එල්ල වී ඇති බාධා මඟහරවා ගැනීමට වෙනිසියුලාවෙන් බොරතෙල් ආනයනය ඉහළ නැංවීමට නවදිල්ලිය පියවර ගනිමින් සිටින පසුබිමක මෙම සංචාරය සිදුවීම සුවිශේෂී කරුණක්.
පසුගිය මැයි මාසයේදී ඉන්දියාව වෙනිසියුලාවෙන් දිනකට බොරතෙල් බැරල් 427,000ක් මිලදී ගනිමින් එහි දෙවන විශාලතම ගැනුම්කරු බවට පත්ව තිබෙනවා.
ඉන්දීය විදේශ අමාත්යාංශ ප්රකාශක රන්දිර් ජයිස්වාල් මහතා සඳහන් කළේ, මෙම සංචාරයේදී දෙරට අතර බලශක්ති සුරක්ෂිතතාව, වෙළඳාම, ආයෝජන, ඖෂධ නිෂ්පාදනය, සෞඛ්ය සේවා සහ පුනර්ජනනීය බලශක්තිය වැනි ප්රධාන ක්ෂේත්ර රැසක සහයෝගීතාව පුළුල් කිරීම පිළිබඳව අවධානය යොමු කරන බවයි.
