ඉන්දීය රුපියලට එල්ල වී ඇති පීඩනය අවම කිරීම සහ විදේශ විනිමය සංචිත ශක්තිමත් කිරීමේ අරමුණින් විදේශගත ඉන්දියානුවන් ඉලක්ක කර ආරම්භ කළ විශේෂ වැඩසටහනක් හරහා මේ වන විට ඇමෙරිකානු ඩොලර් බිලියන 40.8ක මුදලක් රැස් කර ගැනීමට ඉන්දියාව සමත්ව තිබෙනවා.
ඉන්දීය සංචිත බැංකුව (RBI) පසුගිය ජුනි මාසයේ මෙම වැඩසටහන ආරම්භ කළ අතර, 1990 වසරෙන් පසු විදේශ විනිමය ආකර්ෂණය කිරීම සඳහා මෙවැනි ක්රියාමාර්ගයක් ගෙන ඇත්තේ හයවැනි අවස්ථාව මෙය බව විදෙස් මාධ්ය වාර්තා කරනවා.
ඉරානය ආශ්රිත ගැටුම් හේතුවෙන් බලශක්ති මිල ඉහළ යාම සහ මේ වසර තුළ ඉන්දීය රුපියල ඇමෙරිකානු ඩොලරයට සාපේක්ෂව සියයට 6කින් පමණ අවප්රමාණය වීම හේතුවෙන් ඉන්දියාවට මෙම පියවර ගැනීමට සිදු වූ බව ආර්ථික විශ්ලේෂකයෝ පෙන්වා දෙනවා.
මුදල් අමාත්ය නිර්මලා සීතාරාමන්ගේ ඉල්ලීමකට අනුව රාජ්ය බැංකු විදේශගත ඉන්දියානුවන්ට වැඩි පොලී අනුපාත සහ විශේෂ තැන්පතු පහසුකම් ලබා දෙමින් මෙම වැඩසටහන ක්රියාත්මක කර තිබේ. ඇතැම් බැංකු තැන්පත් කරන මුදල මෙන් කිහිප ගුණයක් ණය ලබාගැනීමේ පහසුකම් ද ලබාදී ඇති බව සඳහන්.
ආර්ථික විශේෂඥයන්ගේ ඇස්තමේන්තුව අනුව, සැප්තැම්බර් වන විට මෙම වැඩසටහන හරහා රැස්වන මුදල ඇමෙරිකානු ඩොලර් බිලියන 60 දක්වා ඉහළ යා හැකි අතර, එය ඉන්දියාවේ සමස්ත විදේශ විනිමය සංචිතයෙන් සියයට 10කට ආසන්න ප්රමාණයක් වනවා.
