ඉන්දියාව සහ රුසියාව අතර ආර්ථික සහ උපායමාර්ගික සහයෝගිතාව සැලකිය යුතු ලෙස වර්ධනය වී ඇති බව ඉන්දීය විදේශ අමාත්ය ආචාර්ය එස්. ජයිශංකර් රුසියානු ජනාධිපති ව්ලැඩිමීර් පුටින් හමුවේ ප්රකාශ කර තිබෙනවා.
මෙම හමුව පැවැත්වුණේ මොස්කව්හි ක්රෙම්ලිනයේ දී යි.
ජයිශංකර් මොස්කව් සංචාරයට එක්ව තිබුණේ ඉන්දු–රුසියා අන්තර්රාජ්ය කොමිසමේ 27 වැනි සැසියට සහභාගි වීම සඳහායි. එහිදී දෙරටේ වෙළෙඳ, ආර්ථික, විද්යාත්මක, තාක්ෂණික සහ සංස්කෘතික සහයෝගිතාව තවදුරටත් පුළුල් කිරීම පිළිබඳ සාකච්ඡා පැවැත්වුණා.
ජයිශංකර්, ඉන්දීය අග්රාමාත්ය නරේන්ද්ර මෝදිගේ පෞද්ගලික ලිපියක් ද පුටින් වෙත භාර දුන් අතර, ඉදිරි සති කිහිපයේදී ෂැංහයි සහයෝගිතා සංවිධාන සමුළුවේදී සහ සැප්තැම්බර් මාසයේ නවදිල්ලියේ පැවැත්වෙන BRICS සමුළුවේදී මෝදි සහ පුටින් හමුවීමට නියමිත බව දැනුම් දුන්නා.
රුසියානු ජනාධිපති පුටින් ප්රකාශ කළේ 2025 වසරේ සුළු පසුබෑමකින් පසුව 2026 වසරේ පළමු මාස හයේදී දෙරට අතර වෙළෙඳාම යළි සියයට 8කින් වර්ධනය වී ඇති බවයි. මෙම වර්ධනය සඳහා අග්රාමාත්ය මෝදිගේ සෘජු මැදිහත්වීම වැදගත් වූ බව ද ඔහු සඳහන් කළා.
සාකච්ඡාවලදී බලශක්ති, පොහොර, න්යෂ්ටික බලශක්තිය, උසස් තාක්ෂණය සහ ඖෂධ නිෂ්පාදන ඇතුළු ක්ෂේත්ර රැසක සහයෝගිතාව පුළුල් කිරීම කෙරෙහි අවධානය යොමු විය. ඉන්දියාවේ කෘෂිකාර්මික අවශ්යතා සඳහා රුසියාව අඛණ්ඩව පොහොර සැපයීමට කැපවන බවත් පුටින් සහතික කරනු ලැබුවා.
මෙම හමුව විශේෂ වැදගත්කමක් ගන්නේ, ඉදිරි BRICS නායක සමුළුවට සහ වසර අවසානයේ පැවැත්වීමට නියමිත ඉන්දු–රුසියා වාර්ෂික ද්විපාර්ශ්වික සමුළුවට පෙර දෙරටේ සබඳතා තවදුරටත් ශක්තිමත් කිරීමේ පියවරක් ලෙස සැලකීම හේතුවෙන්.
